Berlîn de ke paytextê Almanya yo, seba kesanê ke Terteleyê Dêrsimî de cuya xo vînda kerda, nîşangeh ame viraştene.
Terteleyê Dêrsimî de ke serranê 1937-1938î de ame kerdene, bi des hezaran şaristanijî ameyî qetilkerdene û surgunkerdene, ey ser o 88 serrî vîyartî. Federasyonê Komelê Dêrsimî yê Ewropa û Komelê Kulturî yê Dêrsimî ke Berlîn de yo, seba ke no tertele nêro xovîrrakerdene, Nîşangeyê “Dêrsim 38 Tertele” viraşt.
Dîzaynê nê nîşangeyî yê Ezgî Kilinçaslanî yo û amadekarîya ey 2015î ra nata dewam kena. Herra nîşangeyî Xozat ra Stanbol û uca ra zî ameya Elmanya. No nîşange, nîşangeyo tewr verên yê Terteleyê Dêrsimî yo ke bi hewayêko resmî ameyo akerdene. Merasîmê akerdişê nîşangeyî parka Blucher Platz de ame kerdene.
Merasîmê akerdişî de Wezîrê Federal yê Zîretî Cem Ozdemîr (Keskî), Papazê Dêrê Evanjelîkî Peter Stork, Serekê Federasyonê Komelê Dêrsimî yê Ewropa Kemal Karabulut, Parlamenterê Federalî yê Partîya Çepî Gokay Akbulut, Prof. Dr. Taner Akçam, Prof. Dr. Tessa Hoffmann, Parlamenterê eyaletî yê SPD’yî Sevîm Aydin û Hakan Demîr û Serekşaredara Friedrichshain-Kreuzberg Clara Herrmann (Kesk) û zaf şaristanijê Elewîyî beşdar bîyî.
Qiseykerdişan de ame dîyarkerdene ke ganî qirkerdişê Dêrsimî nêro xovîrrakerdiş û dewleta Tirkîya ganî nê terteleyî qebul bikera.
