Endama Meclîsê Şaredarîya Parîsî Genevieve Garrigos îfade kerd ke modelo demokratîk ê Rojavayî semedê ameyoxê Sûrîye zaf muhîm o û vat: “Pawitişê nê têkoşînî berpirsîyarîya wijdanî û tarîxî ya komelê mîyanneteweyî ya.”
Wextêko kilmî ra ver sîyasetmedar, parlamenter û îdarekaranê herêmî ra heyetêkê Ewropa herêma Îdareyê Xoserî yê Rojavayî zîyaret kerd. Endama Meclîsê Şaredarîya Parîsî û pawitoxa heqanê merdiman Genevieve Garrigosa ke nê heyetî de ca girewt, ajansê ANF’yî rê qisey kerd.
Genevieve Garrigos dîyar kerd ke heyetî Hemserekê Îdareyê Xoserî û Fermandarê Pêroyî yê HSD’yî Mazlûm Ebdî, îdarekarê YPJ û YPG’yî, hemşaredarê Kobanê zî tede xeylê kesan de pêvînayîş kerd û nê vatî: “Hema hema ma pêro Rojavanê Dîjle ra heta Firatî gêrayî. Ma şîyî Qamişlo, Hesekê, Reqa û Kobanê.
Bi bedilîyayîşê rejîmê Şamî aştî nêameya. Bombarduman û hêrişê dewleta tirke bi destê Artêşa Mîlî ya Sûrîye (SMO) dewam kenê. Şaro ke 2018î de Efrînî ra vejîya şi Şehba û dima ûca ra zî mecbur mend vejîyo, nika Reqa de maneno. Rewşa nê kesan raştîye fînena çiman ver. Şaro sîvîlo ke Awbendê Tişrînî de raştê hêrişê dewleta tirke ame, ma înan reyde qisey kerd. Sîvîlî bi wesayîtanê hewayî yê bêmerdiman yenê hedefgirewtene. Şam de îqtîdar bibedilîyo zî Rojawan de şar xo mîyanê şarî de hîs keno. Nê hêrişê ke vera şarê sîvîlî yenê kerdene sûcê şer î û sûcê merdimîye yê.
Îdareyo Xoser hetêkî ra vera tehdîtanê herême şer keno, hetê bînî ra sîstemê konfederalê demokratîkî yo ke merkezê ci de cinî est a, dano ciwîyayene. Îdareyo Xoser bi sîstemê xo yê demokratîkî semedê ameyoxê Sûrîye mesajo xurt dano îqtîdarê Şamî. Gerek hukmatê Şamî modelê Rojawanî sey nimûne bigîro. Hêzê huqûqî yê mîyanneteweyî gerek vera dewleta tirke, Rojawanî bipawê.
Ma zîyaretê xo yê Rojawanî de hîna nêzdî ra dî ke têkoşînê vera DAÎŞî de senî bedelê girdî ameyî dayene. Kampa Holî de bi hezaran çete û merdimê ci manenê: Ma rijyayîşê Reqa de dî ke newe ra yeno înşakerdene. Fedakarîya ke ma Şehîdgehê Kobanê de dîye, bedelanê tewr girdan ê tarîxê merdimîye ra yew a. Gama ke înşayê Sûrîye yeno mûnaqeşekerdene gerek hêzê mîyanneteweyî Rojawanî çirey orte de nêverdê. Wayîrvejîyayîş û pawitişê Rojawanî semedê ma perûne berpirsîyarî û wezîfeyo ehleqî yo.”
