Sekreterê Karanê Mîyannetweyî yê ERC’yî Adria Guevara vat: “Îqtîdaro newe yê Şamî hêvîya ameyoxî nêdano. Rojawan modelêk o ke rayîr mojneno. Tirkîya Sûrîye de semedê nê modelî tehluke ya.”
Sekreterê Karanê Mîyanneteweyî yê Partîya Çepe ya Katalonya (Esquerra Republicana de Catalunya /ERC) Adria Guevara ajansê ANF’yî rê tehdîtê vera Rojawanî û ameyoxê Sûrîye erjnayî.
Adria Guevarayî ard ziwan ke estbîyayîşê Tirkîya yê herra Sûrîye semedê ameyoxê Rojawanî tehdît o û nê vatî: “Ma sey partî hêrişanê Tirkîya yê vera Rojawanî sey sûcanê şerî yê vera merdimîye hesibnenê. Tirkîya stratejîya îşxalkerdişê herma kurdan rayra bena. Gerek no îşxal bêro vindarnayene. Gerek rayapêroyîye wehşetê dewleta tirke yê vera Rojawanî bivîno û paştî bido kurdan.
Sîstemê Rojawanî semedê ameyoxê Sûrîye muhîm o. Bi nê sîstemî şarî û bawerîye pêro eşkenê mîyanê aştî de pîya biciwîyê. Pratîkê îdareyê Rojawanî zaf muhîm ê. No model gerek sey nimûneyî bêro girewtene. Îqtîdaro newe yê Şamî hêvîya ameyoxî nêdano. Ma semedê nê hukmatê neweyî yê Sûrîye qesawet kenê.
Xeylê welatî vera hêrişanê Rojawanî bêveng ê. Ma Katalonya de bi serran o paştî danê dewaya kurdan. Mabênê Tirkîya û welatanê Ewropa de pêkerdişê semedê macîran û pêkerdişê bînî est ê. Coka tay welatê pîlî yê Ewropa eşkera paştî nêdanê Rojawanî. No nêzdîbîyayîş ganî êdî bibedilîyo.”
