Profesor Gianni Piazza yo ke Unîversîteya Catania de dersanê ”Konfederalîzmê Demokratîkî” dano, vat o xo vera vengdayîşê Rayberê Şarê Kurdî Abdullah Ocalan berpirsîyar vîneno û veng da ke semedê azadîya Rayberê Şarê Kurdî Abdullah Ocalan wa têkoşîn bêro xurtkerdene.
Paytextê Îtalya Roma de 11-12ê sibate de Konferansê ‘Ocalanî rê Azadîye, Meseleya Kurdan rê Çareserîye’ ame kerdene. Profesor Gianni Piazza yo ke Unîversîteya Catania de dersanê ”Konfeederalîzmê Demokratîkî” dano, o zî tewrê konferansî bi. Profesor Piazzayo ke eynî wextî de Komîteya Paştdayîşê Bi Şarê Kurdî yê Sicilya de ca geno, ANFyî rê qisey kerd.
Piazzayî bale ante vengdayîşê Rayberê Şarê Kurdî Abdullah Ocalan yê 27ê sibate ser û nê vatî: ”No vengdayîş eynî wextî de semedê pratîkerdişê konfederalîzmê demokratîkî yo. No têna semedê Rojawanî nîyo, semedê heme waran o. Seba ke vengdayîş bêro vilakerdene û bêro caardene ez xo berpirsîyar vînena. Seke yeno zanayene her hetî ra semedê azadîya Ocalanî û fîkrê ci yê konfederazlîmê demokratîkî paştdayîşo gird est o. No paştdayîş gerek inkey dahîna gird bo.
Mesele ez unîversîte de profesor a û dersanê mi yê sosyolojîya sîyasî de derheqê ‘Konfederazlîzmê Demokratîkî’ û ‘Şorişê Rojawan’î de babetêka taybete est a. Xeyrê nê dersan wendekarê mi derheqê Kurdîstanî de zaf çî musanê. Gerek her kes warê xo de nê fîkran vila bikero. Rixmê tesîrê hemle û têkoşînê şaran hema azadîya Abdullah Ocalanî nêameye caardene. Semedê nê gerek ma bi xurkerdişê têkoşînî şirê hukmatanê xo û hukmatê Tirkîya ser.”
