Hemsereka Meclîsê taxanê Şêx Maqsûd û Eşrefîye yê şaristananê Helebî Hêvîn Silêman derheqê peymana ke mabênê înan û rayberîya demkî ya Sûrîye de ameya kerdene wina vat: “Na peymane do biba bingeyê demokratîkbîyayîşê Sûrîye.”
Destpêkê aşma nîsane de peymanêk seba taxanê Şêx Maqsûd û Eşrefîye yê şaristanê Helebî mabênê meclîsê taxan û rayberîya demkî ya Sûrîye de ameye îmzakerdene. Na Peymane 14 nuqtayan xo de hewînena. Bendê tewr muhîm ê peymane averberdişê cuya hembeşe, pawitişê xocayan, qedexekerdişê rayraşîyayîşanê bi çekan û rêxistinkerdişê ewleyîya zereyî bîye. Reyna awankerdişê komîteyanê seba bicakerdişê bendan û asankerdişê şîyayîş û ameyîşê xo de hewînena.
Hemsereka Meclîsê taxanê Şêx Maqsûd û Eşrefîye yê şaristanê Helebî Hêvîn Silêman derheqê muhîmê û amancanê peymananê ke mabênê meclîsê taxan û rayberîya demkî ya Sûrîye de ameyê kerdene, ajansê ANHA rê qisey kerd.
‘Na peymane sey ‘tarixî’ yena pênasekerdene’
Hêvîn Silêman bale ant peymana ke ameya îmzakerdene ser o û wina vat: “Na peymane prosesêko hesas ê Sûrîye de ameye kerdene. Wexto de ke herêmanê qeraxe yê Sûrîye de qirkerdiş qewimîyenê û bi taybetî binpaykerdişê ke herêmanê Vakûr û Rojhelatê Sûrîye de yenê kerdene, gamêka muhîme bîye. Eynî wextî de ma eşkenê na peymane sey ‘tarixî’ pênase bikerê. Seba ke problemanê ke 14 serran de qewimîyayê, înan ra pey ameye îmzakerdene. Na peymane seba rijnayîşê zîhnîyeto ke îradeyê cinîyan û estbîyayîşê înan mîyanê cayanê qerardayîşî de nêşinasnenê, gamêka pozîtîf bîye.”
‘Peyman rayberdişê û cuya hembeşe amanc kena’
Hêvîn Silêman qiseykerdişê xo de behsê beyannameye destûrî yê ke rayberîya demkî ya Sûrîyeyî kerd û wina dewam kerd: “Destûro ke ameyo îlankerdene, rolê cinîyan mîyanê nê destûrî ra vet. Nê semedî ra tu bend yan zî nuqtayê ke heqanê cinîyan garantî keno, çin o. Eynî wextî de peymana peyêne ya ke mabênê her di hetan de ameye îmzakerdene, rayberîya hembeşe dîyar kena. No zî bîyo rastîyêk û seba awankerdişê Sûrîyeya Demokratîke ke merkezî nîya û zafhetî bingeyêk o.
‘Wa cinîyê Sûrîyeyî seba heqanê xo xover bidê’
Hêvîn Silêman vengda cinîyanê Sûrîyeyî ke bibê wayîrê îrade ke heqanê xo destûrê Sûrîyeyî de bigîrê û wina vat: “Rejîm û rayberîya newa zî îradeyê cinîyan nas nêkeno. Nê semedî ra ganî cinî estbîyayîşê xo ser o heme waranê sîyasî, komelî û dîplomasî de bi israr bibê. Seba ke rolê înan sey serdemê Baasî de nêrê vîndîkerdene.”
‘Bi hêvîyê ke na peymane bibab bingeyê demokratîkbîyayişê Sûrîye’
Hêvîn Silêman peynîya qiseykerdişê xo de dîyar kerd seba Sûrîyeya Demokratîke heqanê heme kesan pawenê û wina qedêna: “Destûro nikayîn temsîlkarîya waştiş û îradeyê şarê Sûrîye nêkeno. Ma hêvîdar ê ke na peymane seba demokratîkbîyayîşê Sûrîye biba bingeyêk.”
