Endama TJA’yî Dîdem Nur Acabey, dîyar kerd ke vengdayîşê Rayberê Şarê Kurdî Abdullah Ocalanî tewr zêde hetê cinîyan ra ameyo pêşwazîkerdiş û no vengdayîş semedê cinîyan “şewqê hêvîye” yo.
Goreyê xebera Jinnewsî vengdayîşê “Aştî û Komelê Demokratîkî” ê Rayberê Şarê Kurdî Abdullah Ocalanî hema zî dewam keno. 23yê teşrîna verêne 2024ine de Parlamenterê Partîya Têduştî û Demokrasî (DEM Partî) yê Rihayî Omer Ocalan dir kombîyayîşêk ame kerdiş. Nê dir Heyetê Îmraliyî yê DEM Partî şî Girawa Îmrali û Abdullah Ocalanî dir 3 pêvînayîş kerd. 27ê Sibate de zî mesajê Abdullah Ocalanî rayapêroyî dir pare kerd. Welatijî dîyar kenê ke ganî lezkî gamî bêrê eştiş.
Aktîvîsta Têgêrayîşê Cinîyanê Azadan (TJA) Dîdem Nur Acabey vengdayîşê “Venga Aştî û Komelê Demokratîkî” ercna.
‘Tewr zêde cinî vengdayîşî rê wayîr vejîyayî’
Dîdem Nur Acabey dîyar kerd ke vengdayîş bi hêvîyêk pîl ameyo pêşwazîkerdiş û va: “Tirkîyayêke est a ke no demêk derg o mîyanê tarîtî û tecrîdî de ya. Kampanyaya ‘Çareserîya demokratîke ya meseleya kurdî ya semedê azadîya Abdullah Ocalanî’ ke payîzê 2023ine de dest pêkerd, pêro dinya de ameye kerdiş û cewabêk mutleq ê bi serran ame vînayîş. Proseso ke ma ci ra vanê tecrîdo mutleq, prosesêk wina bî ke bi tu hawayî nêeşkayî xo biresnê Rayberê Şarê Kurdî Abdullah Ocalanî û no tecrîd tewr zêde tesîr cuya cinîyan ser o keno. Semedo ke cinî wina rewşêke de yê ke nêeşkenê cayêk semedê cuye peyda bikerê, nêeşkenê aver şêrê û nêeşkenê xo îfade bikerê. Coka cinîyan nê vengdayîşî zaf muhîm dî.”
‘Tewr zêde cinîyan xo vengdayîş de dî’
Dîdem Nur Acabey, dewam de wina va: “No vengdayîş semedê cografyayêke Kurdistan de polîtîkaya şerê taybetî û şerê psîkolojîkî yena kûrkerdiş, wayîrê manayêke tewr pîl a. Cinî eşkenê nê wareyan de aver şêrê û cuya azad newe ra awan bikerê ke ciwanî semedê ameyoxî aver şêrê. Wexto ke nê wareyê demokratîkî nêrê awankerdiş, na yena a mana ke her roje qirkerdişê cinîyan ser dewam kenê û şîdetê camêrd û dewlete tewr kûr beno. Cinî dinyayêke wina nêwazenê. Nê semedî ra ‘Vengdayîşê Aştî û Komelê Demokratîkî’ vengdayîşêk ke tewr zêde cinî xo ci de vînenê.”
Têkoşînê semedê edaletî!
Dîdem Nur Acabey dîyar kerd ke ganî pêro cinî xo mîyanê nê vengdayîşî de bivînê û va: “Têgêrayîşê azadîya kurdî û cinîyê kurdî, wayîrê têkoşînêk 50 serrî yo dewam keno. Labelê no têkoşîn tena têkoşînêk ke xo binimino nîyo, têkoşînê demokrasî yo. No têkoşînê edaletî yo. Ma paweyê ke bingehê heqê destûrî yê demokratîkî bi awankerdişê hîn komîsyon û wareyê ke cinî, ciwanî, rêxistinê sivîlî û pêro derûdorê xo berpirsyar vînenê, bêrê awankerdiş, ameyoxê înan awankerdişê komelêk demokratîkî de yo.”
