Hemserekê DEM Partî Bakirhanî roja diyîne ya Konferansê Yewîya Ewropa, Tirkîya, Rojhelatê Mîyanênî û Kurdan de vat ke çareserîya meseleya kurdan yew tercîh ney mecburîyet a.
Konferansê Mîyanneteweyî yê Yewîya Ewropa, Rojhelatê Mîyanênî, Tirkîya û Kurdan ê 19inî Parlamentoyê Ewropa de dest pêkerd ke hetê Komîsyonê Hemwelatîyan ê Tirkîya yê Ewropa (EUTCC) ra yeno kerdene û di rojan do dewam bikero.
Roja diyîne de roniştişê verênî de hêverî Hemserekê DEM Partî Tuncer Bakirhanî qisey kerd.
Bakirhanî da zanayene ke bi Vengdayîşê ‘Haştîye û Komelê Demokratîkî’ yê Rayberê Şarê Kurdî Abdullah Ocalanî hêvîya çareserîya meseleya kurdan zêdîyaya. Bakirhanî pare kerd ke meseleya kurdan global bîya û nika seba çareserîya meseleya kurdan firsendî virazîyayê.
Bakirhanî îfade kerd ke Tirkîya de şaredarîyan rê qeyûmî tayîn benê û kerdişê antîdemokratîkî est ê. Bakirhanî ard ziwan ke seba demokratîkbîyayîşê Tirkîya ganî meseleya kurdan bêra çareserkerdene. Bakirhanî vat: “Çareserîya meseleya kurdan yew tercîh ney mecburîyet a.”
Avûkatanê Buroyê Huqûqî yê Asrinî ra Mazlûm Dînçî zî bale ante heqê hêvîye ser û vat: “Birêz Ocalan tim gêrayêne çareserîya meseleya kurdan. Ganî Tirkîya heqê hêvîye bîyara ca. Na babete de ganî Yewîya Ewropa tedaya Tirkîya bikera. Seba ke Birêz Abdullah Ocalan nê prosesî de rolê xo bîyaro ca ganî azad bibo. Bingeyê nê prosesî de azadîya Abdullah Ocalanî est a.”
