Avûkat Faik Ozur Erolo ke Heyetê Îmraliyî de ca geno ard ziwan ke gerek şertê azad xebityayîş û îmkanê resnayîşî yê Rayberê Şarê Kurd bêrê caardene ke o bieşko xo îfade bikero.
Avûkatanê Rayberê Şarê Kurd ra Faîk Ozgur Erolo ke Heyetê Îmraliyî de ca geno derheqê detayanê pêvînayîşî de ajansê ANF’yî rê qisey kerd. Qiseykerdişê Erolî ra qismêko kilm wina yo:
“Ez verî nê vajî semedê ma raşta zî pêvînayîşo zaf erjîyaye bi. Reyna Birêz Ocalan rî bi bî vînayîş zaf qiymetin o. Ma Birêz Hamîlî Yildirim, Birêz Veysî Aktaş û Birêz Omer Hayrî Konar zî dîyî. Pêvînayîşêko samîmî bi. Coka zîyaretêko zaf bitesîr bi.
Rojdemê pêvînayîşî metnê vengdayîşî bi. Pêro ûca bî, heyetê ma zî ûca bi û pêvînayîşêk ame kerdene. Xora Birêz Ocalanî qisey kerdêne ma goştarî kerdêne. Ge-ge persî û munaqeşeyî zî bîyî. Xora o bi metnê ke bi destê xo nuşto ame û vat ez vana wa nameyê ci Vengdayîşê Haştîye û Komelê Demokratîkî bo û dima ra erjnayîşê metnî dest pê kerd. Verî ey ma rê metn wend. Wexto ke wendêne ge-ge vindetêne û ma rê paragraf-paragraf eşkerayîyî kerdêne.
Birêz Ocalan goreyê fotografî dahîna hol û xoser bi. Dahînî sereberz, dahîna bimoral û hêzdar bi. Gerek nêro vîrakerdene ke Birêz Ocalan 26 serrî yo ûca binê tecrîdî de yo. Heyetî ra yew-di embazan vat ‘seba ke nê prosesî de ma torê bibê hetkar ma bêrê tîya biney cayê ti de bimanê’ naye sero wîya û vat, ‘Şima nieşkenê tîya bimanê.’ Raşta zî wina rehet nîyo.
Embazanê bînan zî fîkrê xo îfade kerdî. Seba ke ma pîya nan werd, ma biney qala şartanê înan kerd û mesajê înan girewtî. Ê 2015 de şîyî ûca û wextî ra nata hema avûkat nêdîyo. 5 serrî yo merdimanê xo zî nêvînenî.
Nika gerek şertê azad xebityayîş û îmkanê resnayîşî yê Rayberê Şarê Kurd bêrê caardene ke o bieşko xo îfade bikero. Birêz Ocalan na mesele zaf hîra geno dest. Na çarçewe bi netnêkî nîna îfadekerdene. Gerek o bieşko embazanê xo rê îzah bikero. Gerek bieşko xo şarê xo rê îzah bikero. Semedê nê zî gerek rî bi rî qisey bikero. Coka gerek îmkanê rensayîşî bêrê hîrakerdene. Xora gerek hinî behsa tecrîdî mebo. Heta gerek behsê zîndanî zî bêro wedaritene. Na çarçewe de îmkanê neweyî gerek bêrê akerdene. Yew zî zaf kesê est ê ke wazenê verê nê prosesî bigîrê. Vera nînan zî gerek proses bêro pawitene. Ma sey heyet bêşik çîyo ke hewce keno ma do bikerê la no gure serê vekaletî ra nê gerek serê eslê ci ra bêro rayraberdene.”
