Taxa Şêxmeqsûd û Eşrefiye bi hezaran şar kom bî û mesajê tarîxî yê Rayberê PKK’yî Abdullah Ocalanî goşdarî kerd. Cinîyê ke mesaj goşdarî kerdî azadîya Abdullah Ocalanî waştî û vatî: “Ma pey fehm û perspektîfê Rayberî de têkoşînê xo dewam bikerê, heta ke ma Rayberê xo xelas bikerê.”
Heyetê Îmraliyî yê Partîya têduştî û demokrasî (DEM Partî) roja paşeme zîndanê Îmraliyî de reya 3ine Rayberê PKK’yî Abdullah Ocalanî dir pêvînayîş kerd. Ahmet Turk, Pervîn Buldan, Sirri Sureyya Onder, Tulay Hatimogullari, Tuncer Bakirhan, Cengîz Çîçek û Faîk Ozgur Erol beşdarê kombîyayîşê 3ine bîyî. Tepişte Omer Hayrî Konar, Hamîlî Yildirim û Veysî Aktaş zî beşdarê pêvînayîşî bîyî. Badê pêvînayîşî heyet, Stenbol de kombîyayîşêk çapemenîye organîze kerd û venga Abdullah Ocalanî ya “Aştî û Komeleyê Demokratîk” eşkera kerd. Kombîyayîş de fotografê Abdullah Ocalanî, heyetê Îmraliyî û 3 tepişteyanê bînan zî ame parvekerdiş.
‘Xelasîya Rayberî wezîfeyê ma yo’
Henîfe Mihemed qiseykerdişê xo Jinnewsî rê kerd û wina vat: “Bî 26 serrî yo ke ma paweyê vînayîşê Rayberî yê la ganî Rayberê ma bêro xelisnayîş. Xelasîya Rayberî wezîfeyê tewr sereyîn ke keweno milê ma ser. Ma do goreyê ercnayîşê Rayberî xebata xo bidê dewamkerdiş.”
‘Na roja serkewtişî ya’
Zîlan Elî vat: “Ma roja vînayîşê Rayberî yê ekranî ser o pîroz kenê. Ewro azadîya Rayberî do biba azadîya temamê şaran. Na roje semedê ma roja serkewtişî ya.”
‘Ma semedê Rayberê xo nêvindenê’
Hêvîn Silêman zî fikrê xo ard ziwan û vat: “Bi coşêk pîl ma paweyê eşkerayîya tarîxî ya Rayberê xo bîyî. Ma do bi nê coşî Rayberê xo xelas bikerê. Ma oxirê têkoşînê azadîya Rayberî de rincan nêbenê.”
‘Ma silamanê xo Rayberî rê şirawenê’
Muna Kibik da zanayîş ke mesajê Rayberê PKK’yî Abdullah Ocalanî semedê înan tarîxî bî û vat: “Ma mîyanê kelecanêk zaf pîlî de yê. 26 serrî yo ma paweyê na roje bî ke ma mesajê Rayberê xo bivînê. Ma do semedê Rayberê xo çi ma ra bêro waştiş ca bîyarê. Ma goreyê perspektifê Rayberê xo têbigêrê û têkoşînê xo pîl bikerê. Ma hezar silamanê xo Rayberê xo rê şirawenê.”
‘Ma do tim lingan ser o bê’
Tewro peyîn Nisrîn Mihemed zî wina vat: “Bi coş û moralêk pîl ma eşkerayîya Rayberê xo goşdarî kerd. Ma paweyê na roje bî. Na roje semedê ma mîladêk newe yê tarîxî ya. Ma do tim lingan ser o bê ke heta Rayberê xo azad mîyanê xo de bivînê.”
