Warê Şêx Seîdî yê Amedî bi hezaran kesî goş da serê vengdayîşê Rayberê PKK Abdullah Ocalanî. Dima mesajê Rayberê PKK Abdullah Ocalan ame wendiş, welatijan fikir û pawitişê xo ard ziwan û waştê tecrîd bi peynî bibo û Abdullah Ocalan azad bibo.
Heyetê DEM Partîye yê Îmraliyî peynîya pêvînayîşê bi Rayberê PKK’î Abdullah Ocalan rê pê ard, vizêr Otelê Elî Worldî yê Stenbolî de vengdayîşê tarîxî yê Abdullah Ocalanî bi raya pêroyî ra pare kerd. Mesajê Abdullah Ocalan Amed de zî ame goştarîkerdiş. Şaristanê dormeya Amedî ra bi hezaran welatij ameyê Warê Şêx Seîdî. Welatijan Ajansê Welatî rê qise kerd.
Welatij Huseyîn Taniş vîr ard ke hezar serrê ewta de yê û wina va: “Seba ke şer Kurdisan û Tirkîya de est o, bi hezaran merdim cuya xo dest da. Nê 40 serrê Rojhîlatê Mîyanên de gonî rijyeno, zaf bedelê giran ameyî dayene. Şarê kurd nê evîndarê vejyayîşê koye bî, seba waştişê xo vejîya ser koyan. Ma seba aştî hadre yê.”
Ziwanê kurdî bibo ziwanê perwerdeyî
Welatij Mehmet Alp zî destnîşan kerd ke heqê kurdan bêrê naskerdene û wina domna: “Dinya de merg tewro nêbaş o, wa merg çinî bo, ma mîyanê cuyayêka rûmet de biciwî. Aştîyêka bi şeref bêra welatê ma. Ganî ziwanê kurdî bibo ziwanê perwerdeyî û polîtîkayê asîmîlasyonî bêrê vindertişî”
Wa Abdullah Ocalan azad bibo
Welatij Fatîme Taniş zî aşkera kerd ke wa dewlete gamê fermî bierzo û wina domna: “Ma aştî wazenê, wa êdî kes nêmiro, ne gerîlla ne zî lejker. Serek û welatê ma azad bibo. Tecrîd bihawanîyo Abdullah Ocalan azad bibo.”
Welatij Mahmut Yayasît zî ard ziwan ke hetanî aştî nêro, ê doza xo veranêdanî.
Yilmaz Altindag destnîşan kerd ke ê wazenê wa aştî û huzur bêro, ê nêwazenê şarê kurd binê zilmî de bibo.
