Sosreta kopiyê ya bi piştgiriya hişê çêkirî ku beriya ezmûnên ketina zanîngehê derket holê, bû sedema îstifaya Wezîrê Perwerdeyê yê Koreya Başûr Choi Kyo-jin. Di ezmûnan de 111 nelirêtî bi amûrên elektronîkî ve girêdayî hatin tespîtkirin.
Wezîrê Perwerdeyê Choi Kyo-jin piştî sosreta di 22yê Mijdarê de îstifa kir. Serokkomar Lee Jae-myung jî îstifa pejirand.
Sosret di 15ê Mijdarê de derket holê, dema ku namzetekî ku di pêşbirkekê de bibû yekemîn, li xwe mikur hat ku bi rêya kamera û telefonê ji hişê çêkirî alîkarî wergirtiye. Ev bûyer çar roj beriya ezmûna ketina zanîngehê qewimî ku nêzîkî nîv milyon xwendekar beşdarî wê dibin. Li ser vê yekê li derdora navendên ezmûnê girêdana Wi-Fi hat qutkirin û hat ragihandin ku dê 68 hezar euro xelat bidin kesên ku bûyerên kopiyê ragihînin.
Bersiva Wezîr Choi ya li parlamentoyê li ser pirsa gelo dê bikaribin kesên kopiyê dikişînin tespît bikin an na, bû sedema nerazîbûnan. Choi gotibû ‘Ji ber temenê xwe ez ne bawer im ku ez ê karibim vê bikim.’ Wezîr di rojên piştre de beşdarî civînên çapemeniyê jî nebû.
Di ezmûna ketina zanîngehê ya roja Pêncşemê de 111 nelirêtî bi amûrên elektronîkî ve girêdayî hatin tespîtkirin. Hat ragihandin ku di nîvê bûyeran de xwendekaran telefonên xwe radest nekirine û ev amûr bi rêya peyamên elektronîkî hatine diyarkirin.
Choi li ser hesabê xwe yê Xyê daxuyaniyek da û diyar kir ku ezmûn bêyî bûyereke mezin bi dawî bûye lê ew ji rexneyên derbarê kêmasiyên amadekariyê de berpirsyar e û wiha got: “Ji ber ku ezmûn êdî qediyaye, ez hemû berpirsyariya tiştên ku qewimîne digirim ser milên xwe û îstifaya xwe pêşkêş dikim.”










