Malbatên girtiyên nexweş, TUAY-DER, OHD, ÎHD û DEM Partî bi daxwaza berdana girtiyên nexweş li ber Wezareta Dadê dest bi çalakiya rûniştinê kir. Çalakiya ji bo berdana girtiyên nexweş dê sibe jî li heman cihî berdewam bike û ji bo tevlibûna çalakiyê bang li raya giştî hate kirin.
Malbatên Girtiyên Nexweş Evîn Zapsu û Newroz Bozkurt, Komeleya Piştgirî û Piştevaniyê ya Malbatên Girtî û Hikumxwaran re (TUAY-DER), DEM Partî, Komeleya Hiqûqnasên Ji bo Azadiyê (OHD), Komeleya Mafên Mirovan (ÎHD) û bi beşdariya gelek kesan bi daxwaza berdana girtiyên nexweş û gihîştina mafê tenduristiyê li ber Wezareta Dadê çalakiya nobedê ya bêdem da destpêkirin. Parlamenterên DEM Partiyê û gelek kes jî ji bo piştgiriyê tev li çalakiyê bûn. Piştî daxuyaniyê girseyê dest bi çalakiya rûniştinê kir û tevî astengî û dorpêça polîsan jî çalakiya xwe heta seat 16:00an domandin.
Piştre jî girseyê li vir daxuyanî da û çalakiya xwe ji bo îro bi dawî kire. Di daxuyaniyê de pankarta navê girtiyên nexweş li ser bû û li ser, “Em ê deriyên zindanê bi berxwedanê vebikin” dinivisî hat vekirin. Her wiha girseyê bênavber dirûşmeyên, “Girtiyên siyasî rûmeta me ne”, “Ji girtiyên nexweş re azadî” berz kir.
Bangawaziya xurtkirina çalakiyê
Hevserokê Şaxa ÎHDa Enqereyê Omer Faruk Yazmaci li vir axivî û diyar kir ku wan gelek caran bal kişandibû ser rewşa girtiyên nexweş û wiha got: “Lê ew daxwazên me bi cih nehatin û hefteya borî Tuncer Saglam jiyana xwe ji dest da. Mafê jiyanê nabe mijara bazarê. Lîsteya li vir ew kes in ku dewletê wan girtiye lîsteya kuştinê. Em li vir li dijî polîtîkayên kuştinê yên dewletê li vir in. Sibe jî em ê seat di 14:00an de li vir çalakiya xwe bidomînin. Em bang li hemû kesan dikin ku werin piştgiriya çalakiyê bikin. Em soz didin girtiyan ku heta hemû girtiyên nexweş werin berdan em ê çalakiya xwe bidominin.”













