Welatiyên Amedê bertek nîşanî polîtîkayên şer û bûdçeya ji şer re tê veqetandin dan û gotin: “Sedema pirsgirêka aborî, şerê ku 50 sal in didome ye. Lewma hewce ye pêşî aşitî pêk were, piştî wê aborî jî dê çêbibe.”
Li welatên ku li şûna siyasetê çek tên bikaranîn, ewilê aborî pê re girêdayî exlaq, çand, perwerde û hwd. têk diçin. Ji ber polîtîkayên înkar û îmhakirinê li Kurdistan û Tirkiyeyê hemû çavkanî û dahat ji şer re tê veqetandin, hêza dan û stendinê ya gel di bin siya polîtîkayên şer de dihele, namîne. Li hemberî vê li welatên demokrasî hatiye pêşxistin û siyaset li pêş, aborî û aramiya civakê di asteke jor de ye, hêza dan û stendinê xurt dibe, xizanî û bêderfetbûn ji holê radibe.
Welatiyan Amedê bertek nîşanî polîtîkayên aboriyê û şêwaza meşandina siyasetê dan. Welatî diyar kirin ku rewşa nebaş a aboriyê rasterast bi polîtîkayên şer ve girêdayî ye wiha gotin: “Îro tu nikarî biçî xwaringehekê xwarinê bixwazî. Aborî ne baş e, mirov nikare debara xwe bike. Sedema pirsgirêka aboriyê herî zêde şerê ku 50 sal in dewam dike ye. Lewma hewce ye pêşî aşitî pêk were, piştî wê aborî jî dê çêbibe.”



















