Cinîyê kurdî yê Başûrê Kurdîstanî welatê Swêdî de seba ke derheqê tarîxê cinîyan o ke nênusîyayo û Jineolojî de bibê wayîrê melumatan, beşdarê dewreyê perwerdeyî bîyî.
Bi pêşengîya rêxistina ‘Keyeyê Cinîyan’ û hemkarîya rêxistinanê cinîyanê kurdan û ‘Akademîya Jineolojî’ şaristanê Goteberga Swêdî de, na reya yewin a ke seba cinîyanê Başûrê Kurdistanî dewreyêka perwerdeyî ya hirê rojan yena dayene. Bi desan cinîyê ke beşdarê dewreyî bîyî, derheqê tarîxê cinîyan o ke nênusîyayo û Jineolojî de munaqeşeyî kerdî. Cinîyan dewreyî de bale ant problemanê komelkî û derûnîya kes û keyeyanê kurdan ê ke teberê welatî de ciwîyenê ser o. Cinîyan ewnîyayîşê xo yê derheqê rayîranê çareserîya probleman de îfade kerdî. Cinîyan bale ant zanayene û xorêxistinkerdişî ser o.
‘Ganî cinî xo rêxistin bikerê’
Endama Keyeyê Cinîyan a Osloyî Rûbar Yusuf dewreyî de qisey kerd. Rûbar Yusufî behsê amancê rêxistina Keyeyê Cinîyan û karanê înan ê na serre de kerd û veng da cinîyanê teberê welatî ke xo her hetî ra rêxistin bikerê. Rûbarî wina va: “Kar û aktîvîteyê cinîyanê teberê welatî, muhîm ê. No zî keno ke problemanê kes û keyeyanê kurdan ê ke teberê welatî de yê safî bikerê. Ganî cinîyî xo rêxistin bikerê û cinîyê kurdî bibê bihêz.”
Behsê tarîxê cinîyan o ke nênusîyayo ame kerdene
Endama Akademîya Jineolojî Necîbe Qeredaxî hirê rojê dewreyî de çarçewaya dersê teorîkî de bale ant tarîxê cinîyan o ke nênusîyayo ser. Necîbe, behsê xoverdayîş û mîrasê ke Jineolojî pê bawer a kerd. Necîbe behsê wendişê tarîxî kerd û amancê Jineolojî yê tevgerê azadîya cinîya kurde ser o qisey kerd. Necîbe Qeredaxî îfade kerd ke rolê cinîyan Rojhelatê Mîyanênî, Kurdîstan û serdemê tarîxî de muhîm o û veng da cinîyanê Başûrê Kurdistanî ke na qonaxe de rolê xo bigîrê.
Beşê terraqe de yew beşdara dewreyî wina va: “Na reya yewin a ke mi Jineolojî eşnawit la bi Jineolojî keyberêko gird mezgê mi de abîya. Ez wazena hîna zaf bizana, ma cinîyê kurdî hewcedarîya ma bi fehmkerdişê tarîxê ma est a.”
Badê dewreyî hunermenda nîgarkêşa Ronak Ezîzî muhtewaya babete bi wêne xêz kerd.
Peynî de Berpirsîyara Komela Cinîyanê Kurdan Mezîye Emîn sipasîya Akademîya Jineolojî û Rêxistina Keyeyê Cinîyan kerd û wina va: “Dewamê nê hewldayîşan zaf muhîm o. Na qonaxe de hewcedarîya ma cinîyanê kurdan bi gamanê girdan est a.”
