Parlamentera DEM Partî ya Şirnexî Newroz Uysal dîyar kerd ke tayînkerdişê qeyûmî hêrişê hemverê îradeyê şarî yo û ard ziwan ke hemverê destbendkerdişan û îşkenceyî têkoşînê huqûqî dayo destpêkerdiş.
11ê sibate de hetê Mehkemeya Cezaya Giran ya Amedî ya5. ra hemşaredarê Şaristanê Girdî yê Wanî Abdullah Zeydanî rê 3 serrî û 9 aşmî ceza ameye birnayîş. Badê nê qerarî şarî vernîya awanîya şaredarî de nobete dayî destpêkerdiş. 15ê sibate de qeyûm tayînê şaredarî ame kerdiş. Parlamentera Partîya Têduştî û Demokrasîyî ya Şaran (DEM Partî) ya Şirnexî Newroz Uysal prosesê tayînkerdişê qeyûmî JINNEWSî rê erjna.
‘Hîrê serdem o ke qeyûm tayînê îradeyê şarê kurdî yeno kerdiş’
Newroz Uysal da zanayîş ke hîrê serdem o qeyûmê tayînê şaredarîyanê şaristanî Kurdîstanî benê û vat: “Wan de verê zî mazbata nêameye dayene. Xoverdayîşê şarî rî da û semedê nê reya diyîne bi sebebê cîya hewl da ke qeyûm tayîn bikerê.”
‘Metodê îşkenceyî û çîyê ke ameyî ciwîyayîş provakasyon bîyê’
Newroz Uysal vat, îşkenceyo ke wextê destbendkerdişan de ame kerdiş hetê STK û huqûqnasan ra raporê ci ameyo amadekerdiş û vat: “Dewlete bi qerarê qeyûmî îradeyê şarî xesp kerd. Hêzê asayîşî uca bi ca kerd û bi metodê îşkenceyî hewl da ke şarî bêveng bikerê. Pêwa nê şarê Wanî îradeyê xo mojna. Roja ewilî ra îşkenceyo ke ame kerdiş, ame dîyarkerdiş la bêvengîyêk vera nê ameye awankerdiş. Hemserekê ma persayî û vatî, no provakasyon o, 15ê sibate bi zanebîyayîş ame weçînayîş? Bi nê qerarî çi yeno hedefkerdiş werte de yo.”
‘Hemverê têkoşîn û xoverdayîşî hêriş’
Newroz Uysal wina dewam kerd: “Ma eşkenê vajê ke no tewir îşkence bi taybetî cinîyan ser o benê. Rojê vîyarte de Neslihan Şedal bi sebebê destbendkerdişî rastê îşkence ameybî. Ekîbê ke ameyî tîya bi temamî semedê îşkence û muameleyê xirab ameybî. Uca de bi zanebîyayîş ma ser o hêriş ame kerdiş. Çi ciwan, tut û cinî rastê îşkenceyî ameyê, pêwa ke zanayêne ma parlamenter ê. Ma reyêk ra zêdeyêr rastê şîdetê polîsan ameyî. Helbet hêrişê hemverê dişmenî şexsê de mi nîyê. No hemverê pêro şarê kurdî, cinîyan, têkoşîn û xoverdayîşê rêxistinkerde yo.”
‘Ma bi xurtkerdişê rêxistinbîyayîşî prosesî pêşwazî kenê’
Newroz Uysal wina qedêna: “Ma hemverê îşkenceyan de muracatê huqûqî kerd. Derheqê îşkenceyan de heta nika tu cayêk ra eşkerayîyêk nêameya. Bêvengîya hemverê nê şîdetî nîşaneyê îşkence yo. Ma hemverê prosesî bi xurtkerdişê têkoşînê cinî prosesî pêşwazî kenê.”
