Endamên Meclîsên Dayikên Aştiyê yên Amed, Êlih, Sêrt, Wan, Tetwan û Colemêrgê ji bo azadiya fizîkî ya Rêberê Gelê Kurd Abdullah Ocalan û pêşketina Pêvajoya Aştî û Civaka Demokratîk bi dirûşma “Bijî Serok Apo” ber bi Enqereyê ve ketin rê.
Êlih
Pêşîvekirina Pêvajoya Aştî û Civaka Demokratîk, azadiya fîzîkî ya Rêberê Gelê Kurd Abdullah Ocalan, rewşa girtiyên nexweş û binpêkirinên mafên girtiyan, bi dirûşma “Bijî Serok Apo” ji Amed, Sêrt û Êlihê ber bi Enqereyê ve ketin rê. Beriya ku dayik bi rê bikevin li ber avahiya DEM Partiyê ya Êlihê daxuyanî dan.
Endama Meclîsa Dayikên Aştiyê ya Êlihê Kamîle Şîmşek, li ser navê Dayikên Aştiyê yên Êlih û Sêrtê axivî û wiha got: “Em Dayikên Aştiyê ne û em aştiyê dixwazin. Ger ku dayikên leşker û polîsan jî bên cem me, em ê bi hev re ber bi Enqereyê ve biçin. Em ji bo aştiyê diçin, da ku aştiyeke mayîn pêk bê. Em vê aştiyê ji bo Serokê xwe û hemû girtiyên di zindanan de dîl tên girtin dixwazin. Dema ku Serok bê berdan dê hemû cîhan xweş be û aştiyeke xweş bê her çar parçeyên Kurdistanê. Ew kesên ku 30 sal zêde ye di zindanan de dimînin, cezayên şewitandina înfazan ji gelek kesan re hatiye û nayên berdan. Em dixwazin girtiyên nexweş hemû bên berdan. Em ji ber van kiryaran diçin Enqereyê. Divê êdî dewleta Tirk jî gavên şênber biavêje. Ev bû du salan hê jî gavekê neavêtiye. Çiqas hevdîtina bi Serok re çêbibe ew dibêje; ‘Ez aştiyê dixwazim.’ Heta niha tu aştî nehatiye Tirkiyeyê. Em hêvî dikim ku îsal bibe sala aştiyê û azadiyê û ev xwîn neyê rijandin.”
Dayikên Aştiyê bi dirûşma “Bê Serok jiyan nabe” bi rê ketin.
Amed
Meclîsa Dayikên Aştiyê ya Amedê ji bo pêvajoya aştiyê, rewşa girtiyên nexweş, binpêkirina mafên girtiyan û dirêjkirina înfaza girtiyan li Parka Koşuyolû ya navçeya Rêzanê ya Amedê hatin kom û ber bi Enqereyê ve ketin rê.
Beriya ku dayik ber bi Enqereyê ve derkevin rê, li vir ser navê Dayikên Aştiyê yên Amedê, Afîfe Kartal axivî. Afîfe Kartalyê bal kişand ser çûyîna wan a Enqereyê û wiha got: “Em ji bo azadiya Serokê xwe, ji bo rewşa girtiyên nexweş, binpêkirina mafên girtiyan û dirêjkirina înfaza girtiyan diçin. Em naxwazin êdî dayik bigirîn. Bila aştiyeke mayînde ava bibe. Em ê li Enqereyê deriyên girtîgehan vekin.”
Piştî axaftinê Dayikên Aştiyê bi dirûşma “Bijî berxwedana dayikan” hatin birêkirin.
Wan, Colemêrg û Tetwan
Endamên Meclîsa Dayikên Aştiyê yên Wan, Colemêrg û Tetwanê di çarçoveya Pêvajoya Aştî û Civaka Demokratîk de ji bo daxwazên xwe bînin ziman û gavên berbiçav bidin avêtin, ber bi Enqereyê ve bi rê ketin. Dayikan destnîşan kir ku armanca wan a sereke bidestxistina azadiya fîzîkî û statuya Rêberê Gelê Kurd Abdullah Ocalan û azadkirina girtiyên siyasî ye.
Dayikên Aştiyê yên ku li Parka Musa Anter a li Wanê hatin ba hev, ragihandin ku dê di çarçoveya bernameya xwe ya sê rojan de li Enqereyê bi partiyên siyasî re hevdîtinan bikin û di heman demê de “Nobeda Aştiyê” dest pê bikin. Hat zanîn ku Dayikên Aştiyê dê piştî bi cih anîna çalakiya xwe û bernameya berfireh di 3yê Mijdar de çalakiya xwe bi dawî bînin.
Di dema kombûna li parka ku ji bo birêketinê hatibû diyarkirin de, Dayikên Aştiyê bi coşeke mezin dirûşmên xwe berz kirin. Di çalakiyê de bêrawestan dirûşmên “Bijî berxwedana zindana” û “Jin jiyan azadî, azad bike Rêbertî” hatin bêrzkirin.
Bernameya li Enqereyê
Bernameya Meclîsa Dayikên Aştiyê ya li Enqereyê wiha ye:
Dayikên Aştiyê dê sibe di seat 12.00an de li Parqa Meclisê daxuyaniyê bidin. Piştî daxuyaniyê dayik dê derbasî Parka Kurtuluşê bibin û li vir dest bi Nobeda Aştiyê bikin. Dayikên Aştiyê dê di roja 2yan a nobedê de jî li meclise tev li komcivînên partiyên siyasî bibin û heyeta ji dayikan dê serdana partiyên siyasî bike. Dayik piştî meclisê dê bi Wezareta Dadê re hevdîtinê bikin.
