Çalakiya xelkê gundê Arzoxliyê ya li dijî projeya GESê bênavber didome. Gundiyên ku xwestin biçin cihê xebat lê tê kirin carek din ji hêla leşkeran ve hatin astengkirin. Siyasetmedaran li gund bang kirû gotin ku li ser navê van gundiyan tu kes nikare biryarê bide û ev pirsgirêka hemû erdnigariya Kurdistanê ye.
Li gundê Arzoxliyê yê ser bi navçeya Sûrê ya Amedê ve piştî ku ji bo projeya “Santrala Enerjiya Rojê û Saziya Embarkirina Enerjiyê ya Zenkar 2” rapora “Nirxandina Bandora Jîngehê (ÇED)” hatiye dayîn, tê protestokirin û çalakiya gundiyan bênavber didome. Parlamanterê DEM Partiyê Serhat Eren, aktivîsta TJAyê Ayla Akat Ata û nûnerên saziyên sivîl ji bo piştevaniyê li gund amade bûn û bi gundiyan re li ber gund kom bûn û piştre ji wir heta qada ku projeya GESê lê tê çêkirin, bi dirûşmeyên “Axa me û ava me hebûna me ye”, “Em GESê naxwazin” û “Bijî berxwedana Arzoxlî” meşiyan. Dema girse gihişt nêzî qadê ji aliyê leşkeran ve carek din hatin astengkirin. Dû re li cihê çalakiyê daxuyanî hat dayîn û piştre xelkê gund dest bi çalakiya rûniştinê kir.
‘Ev pirsgirêka hemû erdnîgariya Kurdistanê ye’
Parlamenter Serhat Eren da zanîn ku ev ji sed salî zêdetir e ku gundî li vir jiyan dikin û wiha got: “Jin jî, zarok jî naxwazin koç bikin, debara xwe li vir dikin. Dîsa di raporê de çi tê gotin? Dibêje ku gava ev proje bikeve meriyetê, di warê tenduristiyê de jî wê gelê me bikeve tengasiyê. Em dibînin ku wê ji aliyê tenduristiyê ve bandoreke neyînî li ser wan çêbibe, em vê yekê jî qebûl nakin. Îro banga me ya dawî ew e ku ev ne tenê pirsgirêka vî gundî ye, ev pirsgirêka hemû erdnîgariya Kurdistanê ye. Heke em bêdeng bimînin û destûrê bidin wan, îro li vir dest pê bikin, wê sibê li Pasûrê, li Erxeniyê, li Pîranê bi hezaran ji van ruxsetan bixin meriyetê û me bêax bihêlin. Em vê yekê qebûl nakin û em ê li kêleka gundiyan li dijî vê yekê têbikoşin.”
‘Li ser navê van gundiyan tu kes nikare biryarê bide’
Ayla Akat Ata jî diyar kir ku ew wek TJAyê dê her tim li cem jinên kedkar û berxwedêr bin û wiha axi,vot: “Ev vîna ku her kes bi heyranî lê dinêre çi ye? Ev vîn, vîna xwedîderketina li qada jiyanê ye; di heman demê de têkoşîna hebûnê ye. Li vî welatî xebatên aborî hene û ji niha û pê ve jî dê hebin. Lê heke ev çalakiyên aborî li dijî xweza, mirov, jin û zarokên me bin; erê, mafê me yê îtîrazkirinê heye, mafê me yê protestokirinê heye. Li her cihê ku xebatên aborî li dijî jiyana mirovan û xwezayê bin, wêranî çêbûye. Tirkiye bi hezar û yek mînakên vê yekê re rû bi rû ye, ev mînak hene. Tenê nêrîna li bîra dîrokî jî bes e.
Nexwe divê çi were kirin? Li ser navê van gundiyan tu kes nikare biryarê bide bê ka dê çalakiyên xwe yên aborî çawa bimeşînin. Li ser navê van gundiyan tu kes nikare biryarê bide ka dê çawa bijîn. Li ser navê jinên vî gundî tu kes nikare biryarê bide bê ka dê çawa bijîn û zarokên xwe çawa mezin bikin.
Vîneke vî gundî heye; gundiyên ku vê vînê nîşan didin çi bibêjin, çi yên ku vî welatî bi rê ve dibin, çi yên di opozîsyonê de ne, çi jî saziyên giştî yên ku di bin zincîra ferman û talîmatên desthilatdaran de dixebitin, mecbûr in li gorî wê tevbigerin.”
Nobet û berxwedana xelkê gundê Arzoxliyê li dijî projeyê berdewam dike.
