Xelkê gundê Arzoxliyê û nûnerên rêxistinên sivîl ku xwestin biçin cihê çêkirina projeya GESê lê ji aliyê leşkeran ve hatin astengkirin û dest bi çalakiya rûniştinê kir.
Li gundê Arzoxliyê yê ser bi navçeya Sûrê ya Amedê ve piştî ku ji bo projeya “Santrala Enerjiya Rojê û Saziya Embarkirina Enerjiyê ya Zenkar 2” rapora “Nirxandina Bandora Jîngehê (ÇED)” hat dayîn, karmendên şirketê di bin parastina leşkeran ketin qadê û ev yek hat protestokirin. Girseya ku li ber gund kom bû, ji wir heta qada ku projeya GESê dê lê were çêkirin, bi dirûşmeyên “Axa me û ava me hebûna me ye”, “Em GESê naxwazin” û “Bijî berxwedana Arzoxlî” meşiyan. Dema girse gihişt nêzî qadê ji aliyê leşkeran ve hate astengkirin. Li ser astengkirina leşkeran girseyê dest bi çalakiya rûniştinê kir.
Şêniya gund Gûrbet Çiftçî li cihê çalakiyê da zanîn ku heya şîrket ji nav ax û gundê wan neçe ew ê çalakiya xwe bidomînin û li ber xwe bidin.
‘Em qebûl nakin ku axa me were talankirin’
Hevserokê Rêxistina DEM Partiyê ya Bajarê Amedê Yunus Muratakan jî destnîşan kir ku debara gundiyan li ser serwalkarî û çandiniyê ye lê bi van projeyan ev yek tê astengkirin û wiha axivî: “Bihêlin bila xelkê me xwedîkirina heywanan bike û debara xwe ya aborî pêbike. Em bi xelkê xwe re ne û li dijî vê projeya GESê ne. Lewma em li vir in. Dema em hatin vir, me dît ku leşkerên rûyê wan girtî ji bo qezenca şirketekê hatine. Em qebûl nakin ku şirketên ku axa me, ava me û xwezaya me qir dikin, bi çekan bên parastin. Tevî ku ev der qada sîtê ye jî ev talan tê kirin. Tevî dozên berdewam jî kepçe dikevin qadê.”
