Stenbol – Dayika Aştiyê Meryem Bûlût jî yek ji qurbaniyên Komkujiya 10ê Cotmehê ye. Meryem Bûlût a ku ji bo aştiyê kêiliyek nedisekinî di komkujiya hovane de xatir ji aştiyê xwest. Dayika Aştiyê Sûltan Bozkûrt diyar kir ku hevala wan Dayika Meryem ji bo aştiyê çûbû Enqerê.
Bi ser Komkujiya 10ê Cotmehê ya Gara Enqereyê re 11 sal derbas bû. Du endamên DAIŞê ji Sûriyeyê derbasî Tirkiyeyê bûn û li peytexta Tirkiyeyê Enqereyê êrişî Mitînga Aştiyê kirin. Di êrişê de 104 kesan jiyana xwe ji dest da. Ev êriş hê jî bi awayekî zelal nehatiye eşkere kirin û hesab ji berpirsiyaran nehatiye pirsin. Yek ji wan qurbaniyan jî Dayika Aştiyê Meryem Bûlût bû.
Li her derê çalakvan e
Di 10ê Cotmehê sala 2015an de li Enqereyê DAIŞê êrişî Mitînga Aştiyê kir û di encama komkujiyê de zarok û kal û pîr jî di nav de 104 kes hatin kuştin. Her yek ji bo aştiyê ketibû rê. Ji her deverê Kurdistanê û Tirkiyeyê karker, kedkar, aştîxwaz, azadîxwaz û demokrasîxwaz ew roj li Enqereyê li ber Gara Trênê kom bûbûn ku daxwaza aştiyê ragihînin ji bo dinyayê.
Meryem Bûlût a 71 salî jî yek jî wan aştîxwazan bû. Meryem Bûlût di nava gel de weke Dayika Meryem tê nasîn. Ji ber ku li Stenbolê dayika her kesî bû. Li Stenbolê kîjan çalakî hebe ew jî li wir e. Dayika Meryem ji Êlihê koçî navçeya Îskenderûna Hatayê dike û 25 sal li wir dijî. Li Îskederûn ê kurê wî Ahmet tev li Newrozê dibe û tê binçavkirin. Polîs ji Dayika Meryem re dibêje em ê piştî saetekî din kurê te berdin. Lê bi rojan îşkence li Ahmet tê kirin û paşê tê girtin. Dayika Meryem diçe pêşiya girtîgehê û êdî çalakî li ku hebe ew jî li wir e. Ji wir jî koçî Stenbolê dike. Li Stenbolê jî nasekine geh li Qada Galatasarayayê ye, geh li pêşiya girtîgehan e û çalakî li ku hebe ew li wir e.
Li dijî şer dibe mertala zindî
Dema ku di sala 2015an de li Kurdistanê carek din ji nû ve şer dest pê kir, ji Stenbolê diçe Licê û dibe mertala zindî, dema ku sedema çûyîna wê tê pirsîn dibêje ku “şûna ciwan bimirin bila ez bimirin” û diçe. 40 rojan li Licê dimîne. Di sala 1995an de dema kurekî wê leşker e, yek jî gerîlayê diçe li Cizîre û dibe mertalê zindî. Li Cizirê tê girtin û li Girtîgeha Merdînê tê ragirtin. Dozgerî ji Dayika Meryemê dipirse, “tu çima li dijî leşkeran disekinî?” Dayika Meryem bersiv dide û dibêje, “kurekî min gerîla ye, yek jî leşker e, ji bo hevdu nekujin, ji bo aştiyê çûm.”
Li ku şer hebe diçe li wir û li pêşiya şer disekine. Ji ber ku dizane şer çi ye û ji bo aştiyê têdikoşe. Neviyê wê Çekdar tev li Tevgera Azadiya Kurd bûye û di şerê li DAIŞê de jiyana xwe ji dest dide.
Dayika Meryem Bûlût ji Stenbolê berê xwe dide Enqerê. Dema ku malbat teqînê dibihîse telefonê dayika Meryem dikin. Polîsek telefonê vedike û dibêje “Werin dayika xwe bibin.” Meryem Bûlût di 71 saliya xwe de hesret û evîna aştiyê di dilê wê de ma û li paytexta Tirkiyeyê xatir ji aştiya pêknehatî dixwaze.
‘Destê dewletê jî di qetlîamê de heye’
Endama Meclisa Dayikên Aştiyê ya Stenbolê Sûltan Bozkûrt qala heval û hevrêya xwe Meryem Bûlût kir. Sûltan Bozkûrt wiha qala hevrêya xwe dayika Meryem dike: “Dayika Meryem li her derî bû. Bi hev re em diçûn çalakiyan. Dewleteke wisa hovane dayika Meryemê qetil kir. Ev 11 sal in kujer bi awayekî zelal nehatine darizandin. Dadgeh formalîte berdewam dike. Destê dewletê jî di nava qetlîamê de heye. 104 hevalên me hatin kuştin. Dayika Meryem ji bo aştiyê çûbû Enqereyê. Xwest aştî pêk were. Îro jî aştî heye lê tu gav nehatiye avêtin. Em dixwazin gav bên avêtin. Ez li ber dayika Meryem û tevahiya şehîdan bejna xwe ditewînim.”
