Odeya Bazirganî û Pîşesaziyê ya Amedê (DTSO) hilbijartina xwe pêk bi yek lîsteyê pêk anî. Namzetê Serokatiya Lîsteya Şîn Mehmet Kaya bi ser ket û 53 kes ji bo Meclisa DTSOyê hatin bijartin.
Odeya Bazirganî û Pîşesaziyê ya Amedê (DTSO) hilbijartina xwe pêk anî. Hilbijartin li dibistanek navçeya Bajarê Nû ya Amedê pêk hat. Di dîroka DTSOyê de cara yekemîn bi yek lîsteyê hilbijartin pêk hat. Ev Lîsteya Şîn bû. Li Amedê 7 hezar endamên DTSOyê hene. Ji van 7 hezar endaman 4 hezar endaman dengê xwe bikar anî û di encama dengdayînê de Namzetê Lîsteya Şîn ku yek lîste bû Mehmet Kaya bi ser ket.
Ji bo rêveberiya Meclisa DTSOyê jî 53 rêveber hatin bijartin. Hate zanîn ku temsîlyeta jinan di Meclisê de zêde bûye.
Piştî hilbijartinê Mehmet Kaya û endamên rêveberiya Meclisê hatin ber avahiya DTSOyê û Kaya daxuyanî da çapemeniyê.
‘Şer bandorek neyînî kir’
Mehmet Kaya spasiya endamên DTSOyê kir û bal kişand ser pêvajoya hilbijartinê û got ku beşdariya zêde ya endaman wan kêfxweş kiriye. Mehmet Kaya bal kişand ser pirsgirêka Kurd ku di 40 salên dawî de li herêmê dijwartir bûye û da zanîn ku ew êdî dixwazin xizmeta aboriya Amedê û herêmê bikin. Mehmet Kaya destnîşan kir ku ew ê bi berpirsiyariya ku bi hezaran endaman piştgirî daye rabin û dê hin bêtir xizmeta aboriyê bikin.
Kaya destnîşan kir ku neçareserkirina pirsgirêka Kurd û pêvajoya 40 salên dawî bandorek neyînî û hilweşîner li ser aboriyê kiriye û di vê pêvajoya şer de koçberiya mêjî û sermayeye pêk hatiye.
