Şerê bêpeynî û wişkayî ya ke ramitişî vindarnayo, Sûdanî ver bi felaketêka gird rê bena. Herêma Cebel Marra de gedeyî kêmbîyayîşa çîyê werdiş û şimitişî û rijnayîşê sîstemê weşîye ver cuya xo vindî kenê. Heta nika 31 gedeyî cuya xo ra bîyî.
Sûdan de, şero bêpeynî tewr zêde gedeyan mexdur keno. Bi mîlyonan gedeyî rijnayîşê sektorê weşîye û vindarnayîşê temînkerdena çîyê werdiş û şimitişî, bi tehlukeyê mergî rê rî bi rî yê. Hişyarî yenê dayîş ke rijnayîşê şert û mercanê cuyayîşî yê bingeyînî eşkeno bibo sebebê vîndîbîyayîşê neslêk.
Şer û pêkewtişê domdarî cuyayîşê bi hezaran sîvîlan tehdît kenê
Koordînasyonê Pêroyî yê Kesanê Koçber û Kampanê Penaberan ê Darfûr eşkera kerd ke herêma Sunî ya Cebel Marra ya Rojhelatî de tewr tayê 30 gedeyî merdê û zêdeyêrê 100 gedeyan zî kêmbîyayîşê çîyê werdiş û şimitişî binê tehluke de yê. Hişyarîyê cidî ameyê dayîş ke rewşa merdimîye û weşîye eşkena bibo sebeb ke rijnayîşê xizmetanê weşîye û vilabîyayîşê vêşanîye kontrolî ra vejîyo. Goreyê raporanê merdimîye yê îdarî yê Libba ya eynî herême, tewr tayê gedeyêk merdo û 135 gedeyî zî nêweş kewtê. Şer û pêkewtişê domdar û vindarnayîşê xebatanê ramitişî yê wişkayî ver, Sûdan de cuyayîşê bi hezaran sîvîlan tehluke de yo.
Qiseykerdoxê koordînasyonî, îfade kerd ke pêkewtişê domdar pêro xebatanê ramitişî vindarnayo û citekarî mecbûr kerdê ke erdanê xo ca verdê. Qiseykerdoxî dîyar kerd ke wişkayî û kêmbîyayîşê berardena ramitişî raşteraşt krîzê çîyê werdişî xorîn kena û welatî de problemê vêşanîye giranêr kena.
Heto bîn ra, rayedaranê merdimîye yê rayberîya Libba herêma Omo ya Cebel Marra yê Rojhelatî de, hîşyarî da ke kêmbîyayîşê çîyanê werdişî mîyanê gedeyanê herême de giran beno. Rayedaran îfade kerd ke tewr tayê kesêk merdo, zêdeyêrê 135 hadîseyan ameyî qeydkerdiş û semedê nêbîyayîşa xizmetanê weşîye ra hûmare zêde bena.
Rewşa merdimîye ya herême kontrolî ra vejîyena
Berpirsê hetkarîya merdimîye, dîyar kerd ke merkezê weşîye yê Libba nêbîyayîşê doktor û xizmetanê weşîye ver qasî new aşman pêro girewte mendê, aşma adara vîyarte de newe ra akerdê û dest bi qebulkerdişê xeylî hedîseyan kerdo. Her roje gedeyê ke kêmbîyayîşê çîyanê werdişî ver nêweş kewenê anê nêweşxaneyî û bi na rewşe merdimîye dîyar bena ke herême de krîzêko gird est o.
