Serekê Meclîsî Numan Kurtulmuşî ke akerdişê meclîsî de qisey kerd û va ke hewcedarîye bi qanûno bingeyîn ê neweyî yê demokratîk est a.
Serra 5. ya qanûnronayîşî ya Dewrê 28. yê Meclîsê Tirkîya dest pêkerd. Hemserekanê Pêroyî yê DEM Partî Tulay Hatîmogullarî û Tuncer Bakirhanî zî grûbê DEM Partî reyde meclîsî de hedre bî. Serekkomarê Tirkîya Tayîp Erdoganî zî tewrê akerdişê meclîsî bi.
Serekê Meclîsî Numan Kurtulmuşî ke akerdişê meclîsî de qisey kerd û va ke bi qanûnê çarçewayî yo ke bi vengêko berz amebi qebulkerdiş, berê prosesî abîyo û partîyanê sîyasî rê spasîya xo kerd. Numan Kurtulmuşî bale ante Komîsyonê Çimdarîye ser o û va: “3 berpirsîyarîyê meclîsî est ê. Bi Komîsyonê Meclîsî do prosesê caardişê qanûnî bêro teqîpkerdiş. Seba birayîye mîyanê komelî de xurt bbio xebatan bikero. Ma do seba xurtkerdişî piştîdayîşê komelî mîyanê xebatan de bibê. Ganî heme kes seba ke cîyayîye nêkewo mîyanê komelî, vatişê xo de baldar bo. Ma do bi gamanê bawer dewrê çekdarîye ra ver bi dewrê sîyasî rayra şêrê. Elbet Qanûno Bingeyîn o newe hewcedarîyêk o. Ganî şopê derbeyî bi pêroyî werte ra bêrê wedaritiş.”
‘Hewcedarîye bi qanûno bingeyîn ê demokratîk est a’
Numan Kurtulmuşî dîyar kerd ke hewcedarîye bi qanûno bingeyîn ê demokratîk est a û va: “Ma eşkenê qanûno bingeyînêko azadîwaşt hedre bikerê. Qanûno bingeyîn o demokratîk bi mutabakatêk eşkeno bêro hedrekerdiş. Hetê bîn ra vurnayîşê qanûnî partîyanê sîyasî û weçînayîşan ganî eynî çarçewaye de bêro erjnayîş û pêşnîyazêko hina demokratîk bêro kerdiş. Ganî bêusulî û qezencê niheqî bêrê cigêrayîş û wa berpirsî hesab bidê. Gamê seba prosesî helbet do cîyayîyan werte ra wedarnê. Ma do her tim piştî bidê dewleta Filîstînî ya xoser. Heta Filîstîn azad bibo ma do piştî bidê dewaya Filîstînî.”
