Hêgayanê Baxçeyanê Hewselî û Unîversîteya Dîcleyî yê Amedî de bi desan donimî kenewîr yeno ramitene. Ajansa ma xo resna kordînatanê hêgayan kenewîrî.
Amed û qezayanê ey de demanê peyênan de şuxulnayîşê afyonî zêde bîyo û her ke şono ciwananê Amedî kewenê mîyanê dafiqa hişbirî. Goreyê çimeyanê ma yê ke semedê emnîyetî nêwaşt nameyê xo bidê, zaferîyê hişbirî hetê tayê çeteyan ra hêgayanê Baxçeyanê Hewselî de yeno ramitene. Çimeyê ma yê ke herême rind zanê û hêgayanê afyonî bi çimê xo dîyî, kordînatanê nê hêgayan ma reyde pare kerdî.
Nika parsela 592. ya Unîversîteya Dîcleyî de hêgayê kenewîrî est a
Goreyê agahîyanê ma bidest kerdê, verê 2 rojan kesê ke afyon mîyanê parselo bi hûmara 592. de ramitibî, dest bi çînayîşê ey kerd. Çimeyê ke agahî dayê ma dîyar kerd ke no parsel keweno mîyanê erdê Unîversîteya Dîcleyî û Rektorê Unîversîteya Dîcleyî, rixmê ke nê hêgayan ra agahdar o zî, vera nê çî tu çi nêkeno.
Pirdo Desberî ra heta dewa Tilhamî yeno ramitene
Çimeyê ma îfade kerd ke Pirdo Desberî ra heta dewa Tilhamî ramitişê kenewîrî yena kerdiş û derheqê nê cayanê ke kenewîr tede yeno ramitiş de xeylî rey gilî rayedaranê dewlete rê kerdo la netîceyêk nêamaya girewtiş.
Wextê çînayîşî de nobedaran dorûver de ca kenê
Çimeyê ma dîyar kerd ke wextê çînayîşê kenewîrî yenokerdiş, xeylî nobedarî cayanê berzan ê Baxçeyanê Hewselî de yenê cakerdiş. Goreyê agahîyanê ma bidest kerdê, nê nobedarî herêma Berê Mardînî û Berê Neweyî yê qezaya Sûrî de û Taxa Fîskayaya ya Şaristanê newe de yenê cakerdiş.
Badê çînayîşî eynî ca de binerd kenê
Çimeyê ke agahî dayê ma derheqê vetişê kenewîrî ya cayê ramitişî de zî no çî va: “Wextê çînayîşî kenê, kenewîrî tîya de huşk kenê û binerd kenê. Dima goreyê rotişî bar bi bar tîya ra vejenê. Xora bi şewe û roje nobedaranê înan, dorûverê hêgayan û cayê ke kenewîr tede ameyo nimitiş de gêrenê.”
Kordînatê cêrinî hêgayanê kenewîrî mojnenê û dorûverê nê kordînatan de bi desan donimî hêgayê kenewîrî est ê.
