Merkezê Şêwirmendî û Perwerdeyê Tiryakê Madeyan ê Şaredarîya Amedî ya Şarisatnê Girdî, bi amancê têkoşînê vera tiryakbîyayîşî pêroyî şaristanî de xebatêka hîra da destpêkerdene. Şaredarîye bi raya ekîbanê gêrokan armanc kena ke şaristan de qet yew keye û keyeyê ke înan reyde têkilîyê nêviraşta, nêverdo.
Şaredarîya Amedî ya Şaristanê Girdî, vera tiryakê madeyan ke ameyoxê komelî fîneno tehluke, modelêko têkoşînî yo zafhetî virazena. Merkezê Şêwirmendî û Perwerdeyê Tiryakê Madeyan ke kanûna 2025 de binê banê Serekîya Beşê Xizmetanê Komelî de ameyo akerdene û aşma nîsane ra nat bi hawayêko aktîf dest bi qebûlkerdişê şêwirmendan kerdo; xebatanê sewqkerdişê tedawî, paştîdayîşê psîkososyalî, xebatanê warê yê vernîgirewtişî û çalakîyê vera xurtkerdişê hişmendîya komelî binê yew banî de rayra beno. Şaredarîya Amedî ya Şaristanê Girdî ke seba şêwirmendanê cinîyan amadekarîya akerdişê merkezêko tedawîya bi mende kena, bi raya ekîbanê gerokan armanc kena ke şaristan de keye bi keye bigêro û têkilîyan rono.
‘Heta ewro ma hezar û 500 ra zêdeyêrî pêvînayîşê seansan viraştê’
Pispora Xizmetanê Komelî Berfîn Ayyildiz ke derheqê awanîya xebate û modelê xizmetê yê merkezî de zanayîş da, dîyar kerd ke tede 2 psîkologî, 2 pisporê xizmetanê komelî û 2 personelê paştîdayîşî wezîfedar ê. Ayyildiz va ke muracatanê derheqê tiryakîya teknolojî, alkol û qumare de zî goreyê îmkanan xebitîyenê, la xebatê înan bi giranî warê tiryakîya madeyan de yenê rayraberdene. Dewamê qiseykerdişê xo de Berfîn Ayyildiz da zanayene ke dima muracatî hetê psîkologan û pisporanê xizmeta komelî ra pêvînayîşê verênî yenê kerdene û wina vat: “Ma dîyar kenê ke hewcedarîya şêwirmendî çi ya û semedê ke ey/aye ancenê dormeyanê tehlukeyan û kenê muptelayê madeyan çi yê. Dima ma seba her şêwirmendî planêko taybet ê tedawîkerdişî amade kenê. Netîceyê domdar ê tedawîyanê bi zorî sînordar ê; merdimê ke wazenê tedawî bibê, eşkenê bi girewtişê randevu ya zî bi muracatêko rasterast xizmetan ra îstîfade bikerê. Aşma nîsane ra nat 165 muracatê ma ameyê kerdene. Nê 165 kesî tena yew hûmare nîyê; ê hemwelatîyê ma yê ke vanê
‘Ez wazena bêrî tedawîkerdene’ yan zî ‘Gereka nêzdîyê mi bêrê tedawîkerdene’. Ma rasterast rakewtişê 93 kesan AMATEM de viraşte û paştîdayîşê hewceyî daye înan. Sewbîna zî heta ewro ma 1500 ra zêdeyêr pêvînayîşê seansan viraştê.”
‘Tewr muhîm zî no yo ke domanî qet rastî madeyî nêrê’
Pisporê Xizmeta Komelî Lokman Amaç ke derheqê xebatanê vernîgirewtişî û pawitişî yê merkezî de da zanayîş, dîyar kerd ke tedawîkerdişê merdimanê ke dest bi şuxulnayîşê madeyî kerdo krîtîk o, la amanco esasî no yo ke doman û ciwanî qet rastî madeyî nêrê û nê çîyî vatî: “Eke yewî dest bi madeyî kerdo, verdayîşê ey/aye zaf muhîm o. La naye ra zî muhîmêr no yo ke merdimê ke hema rastî ci nêameyê, qet rastî madeyî nêrê. Ma mabênê 12 û 15 serran de, bi amancê qerardayîşê raştî, fehmkerdişê zeraranê înternetî, weçînayîşê embazanê raştan û bimusê verba stresî de vejîyê atolyeyan organîze kenê û nê xebatî bi raya kayan yenê rayraberdene.”
Na meseleya temamê şarî ya
Lokman Amaç da zanayene ke amanc no yo ke domanî verê qerar-dayîşî bifikirîyê û bierjnê û bieşkê vajê ‘Nê’. Ekîbê gerokî do keye bi keye bigêrê Lokman Amaç dîyar kerd ke seba ke keyeyî bieşkê vurîyayîşê domananê xo wextêko verên de hîs bikerê û paştîdayîşêko profesyonel bigîrê, muhîmî danê perwerdeyê dadî û babîyan û va ke xebatkerê seha yê şaredarîye zî tewrê xebatanê têkoşînê vera tiryakbîyayîşî ameyê kerdene. Sewbîna zî Lokman Amaç dîyar kerd ke seba xebatkeranê şaredarîye derheqê naskerdişê meseleya madeyî û sewqkerdişê raşt ê keyeyanê muracatkaran de perwerdeyî ameyê dayene û va ke ekîbê gêrokî do wextê aver de pêroyî şaristanî de dest bi xebatanê warî bikerê û qiseykerdişê xo wina qedêna: “Amed de qet yew keye nêmaneno ke ma nêşêrê berê ci. Ma do bi ekîbanê xo yê gerokan ber bi ber bigêrê û şarê xo re îzah bikerê ka made çi yo û ma senî eşkenê verê tiryakbîyayîşî bigîrê. Na mesele tenê meseleya yew merdimî yan zî yew keyeyî nîya, meseleya temamê şarî ya. Ma wazenê ke temamê komelî tewrê nê prosesî bibo.”
