Amed – Wendekarê Beşa Ziwan û Edebîyatê Kurdkî yê Unîversîteya Dîcleyî Mazlum Ozdemîrî derheqê konferansê ciwananê wendekaran de ke do meşte bêro viraştiş, dîyar kerd ke ciwanî stûnê bingeyênî yê prosesî yê û wina vat: “Ganî ciwanî xo hîna zaf aver berê û rêxistin bikerê. Rolo tewr muhîm yê ciwanan no yo ke pêşengîya nê prosesî bikerê.”
Bi pêşengîya Wendekaranê Komunalîstan meşte Merkezê Kongreyî yê Çand Amedî yê Amedî de bi sloganê ‘Bi kampusanê komunbîyayeyan dem demê rêxistinbîyayîşî yo’ konferansêk do bêro viraştiş. Wendekarê ke şaristananê Vakurê Kurdîstanî û Tirkîya ra tewrê konferansî bibê do sîyasetanê şerê taybetî, rêxistinbîyayîşê komunî, sîstemê perwerdeyî yê unîversîteyan, Prosesê Aştî û Komelê Demokratîkî û azadîya fîzîkîye ya Rayberê Şarê Kurdî Abdullah Ocalanî ser o vindê û munaqeşe bikerê. Mazlum Ozdemîrî konferansî ser o Ajansê Welatî rê qisey kerd.
‘Ma cehd kenê ke bale biancê wendekaran ser o û hîna zaf wendekaran bîyarê têhet’
Mazlum Ozdemîrî dîyar kerd ke amancê konferansî no yo ke wendekar û ciwanê her caya Vakurê Kurdîstanî û Tirkîya xo rêxistin bikerê û wina vat: “Persa ma na ya: Nê prosesî de rolê ciwanan do çi bo? Ciwanî do seba yewî û piştîpêdayîşî bêrê têhet û na babete ser o qisey bikerê. Nimûne, wexto ke Unîversîteya Dîcle de problemêk vejîyo, unîversîteyê bînî û komê bînî do senî piştîdayîşê înan bikerê û senî pîya xebatêka kolektîfe biramê? Ma do nê babetan ser o vinderê. Xebatê ma yê nikayî zî dewam kenê; ma cehd kenê ke bale biancê wendekaran ser o û hîna zaf wendekaran bîyarê têhet.”
‘Hewcedarîya ma bi xorêxistinkerdiş û pêşengîye est a’
Mazlum Ozdemîrî dîyar kerd ke Prosesê Aştî û Komelê Demokratîkî de rolo tewr muhîm yê ciwanan o û qiseykerdişê xo wina qedêna: “Ciwanî stûnê bingeyênî yê nê prosesî yê. Coka ganî ciwanî xo hîna zaf aver berê û rêxistin bikerê. Rolo tewr muhîm yê ciwanan no yo ke pêşengîya nê prosesî bikerê. Venga ma ciwan û wendekaran rê na ya ke ma her demî ra zêdeyêr hewcedarê xorêxistinkerdiş û pêşengîye yê. Ma heme ciwanan dawetê konferansî kenê.”
