Îstanbul – Rojnameger Îrfan Aktanî derheqê muracatê xo yê şîyayîşê Îmrali de ke seba pêvînayîşê Rayberê Şarê Kurdî Abdullah Ocalanî kerdbî, wina vat: “Çîyêko winasî yo ecêb est o: Îmrali ma ra saetêk dûrî yo la ma nêeşkenê şêrê. Mi seba şîyayîşê Îmrali di rey muracat kerd la muracatê mi bêcewab mendî. Dewlete wazena îmajê ke bi zuran awan kerdo, dewam bikero û îmajê Ocalanî binê kontrolê aye de bo. Coka nêverdana ke rojnamegerî şêrê Îmrali.”
Prosesê Aştî û Komelê Demokratîkî bi vengdayîşê Rayberê Şarê Kurdî Abdullah Ocalanî yê 27ê sibata 2025î dest pêkerdbî. Badê destpêkerdişê prosesî şîyayîşê rojnamegeran yê Abdullah Ocalanî het kewtbî rojeve. Hewteyanê peyênan de munaqeşeya şîyayîşê rojnamegeran yê Girawa Îmrali zêde bîya. Zaf rojnamegeran seba şîyayîşê Îmrali muracatê Wezaretê Edaletî kerdbî.
Nê rojnamegeran ra yew zî Îrfan Aktan o. Îrfan Aktanî seba ke şêro Îmrali û Rayberê Şarê Kurdî Abdullah Ocalanî reyde pêvînayîş bikero, di rey muracatê Wezaretê Edaletî kerdo. Îrfan Aktanî reya verêne 2024î de, reya peyêne zî sibata 2026î de muracatê wezaretî kerdo la heta nika tu cewab nêameyo. Îrfan Aktanî muracatê xo ser o Ajansê Welatî rê qisey kerd.
‘Eke dewlete raştîya Ocalanî qebul bikero, proses do hîna rind bibo’
Îrfan Aktanî îfade kerd ke çapemenî û komelê Tirkîya hema zî raştîya Abdullah Ocalanî fehm nêkerda û wina vat: “Heta nika dewlete vera şexsîyetê Ocalanî îmajêk awan kerdo. No îmaj ke bi zur û manîpulasyonan ameyo awankerdiş, tu eleqeyê ey Ocalanî reyde çin o. Eke bi çimanê komelê kurdan raştîya Ocalanî ra bewnîyê do bivînê ke Ocalan wayîrê statuyêk o. Komelê kurdan û sîyasetê kurdan de statuyê Ocalanî est o. Eke dewlete biwazo Ocalan rolê xo kay bikero û seba aştîye karê xo bikero, ganî statuyêko fermî bêro dayîş. Raştîya kurdan tirkan mîyan de nêyena dîyayîş; la heme Têgêrayîşê Kurdan de raştîya Ocalanî yena zanayîş. Ocalan bi sîyaset û stratejîya xo, bi ardim û qerarê kurdan resayo na pozîsyon. Badê Komployê Mîyanneteweyî hereketê tirkan zerrîya kurdan şikite. Heta o wext Ocalan serekê PKK’yî bî; badê o wext bî Rayberê Şarê Kurdî. Kurdan no qerar da; dewlete qebul nêkero zî raştî na ya. Eke dewlete biwazo aştîyêk ca bîyaro, ganî têkilîyêka seyyewbîne awan bikero. Des serrî Ocalanî ser o tecrîdêko giran bî. Dewlete vatêne ke êdî têkilîya kurdan û Ocalanî ameya birnaye. La ma nika tesîrê Ocalanî yê ser şarê kurdan û têgêrayîşê kurdan vînenê. Dewlete fikirîyêne ke PKK do qerarê feshkerdişî qebul nêkero, la ma raştî dîye. Çunke Ocalan lîderîyêka kolektîfe keno. Eke dewlete raştîya Ocalanî qebul bikero, proses zî do hîna rind aver şêro.”
‘Muracatê mi bêcewab mendî’
Îrfan Aktanî dîyar kerd ke bi wesayîta xo şîyo Qendîl û wina vat: “Rayîrê Qendîlî de mi tu astengî nêdî; zaf noqteyê kontrolî ameyî wedarnayîş. Sebebê wedarnayîşê noqteyan proses o. Ez şîya Rojava zî, eynî rewşe est e. La çîyêko winasî yo ecêb est o: Îmrali ma ra saetêk dûrî yo la ma nêeşkenê şêrê. Seba şîyayîşê Îmrali mi di rey muracat kerd la muracatê mi bêcewab mendî. Çira no çî kenê û asteng dewam keno? Heta nika dewlete qet nêverdayo ke Ocalan vatişanê xo raşteraşt biresno şarî; tim pêvînayîşî qedexe kerdê. Nika zî dewlete wazena îmajê ke bi zuran awan kerdo, dewam bikero û îmajê Ocalanî binê kontrolê aye de bo. Coka nêverdana ke rojnamegerî şêrê Îmrali. Beno ke ameyox de no astengî wedarîyo û rojnamegerê Çapemenîya Azade şêrê Îmrali û persê ke serê komelî de yê, Ocalanî ra bipersê. Ez zaf wazena ke şêra Îmrali; zaf persî serê mi de est ê.”
‘Kurdan tim vat aştî’
Îrfan Aktanî dîyar kerd ke wexto ke merdim komelê kurdan ra bewnîyo, vîneno ke bawerîya înan bi prosesî qels a û qiseykerdişê xo wina qedêna: “Şarê kurdan aştîye wazeno; çunke heta nika zaf dejî antê. Xirabbîyayîşê prosesê 2015î şarê kurdan ser o tesîrêko zaf gird kerd. Komelê kurdan 30 serrî yo ke vano aştî. Şarê kurdan prosesê nikayî ra zî zaf hêvîdar o la seba ke bi dewlete bawer nêkeno, proses tena temaşe keno. Wexto ke firsendê Ocalanî virazîyo û têkilîyêka raşteraşte şarî reyde bêro awankerdiş, no do prosesî ser o tesîrêko pozîtîf bikero.”
