Duran Kalkanî vat ke Têgêrayîşê Azadîye bi hêrişan reyde zî qerardar o ke prosesî biresno netîce û seba ney ganî zemîno huqûqî û sîyasî bêro viraştene: “Dermanê tekane yê xelasîya Tirkîya demokratîkbîyayîşo bingeyê azadîya kurdan o.”
Endamê Akademîya Zanistê Sosyalî ya Abdullah Ocalanî Duran Kalkanî programê taybetî yê Medya Haberî de vat ke qanûnê çarçewa 40 rojî ra ver bi rayanê rekorî vejîya, la tu gama şênbere nêameya eştene; qanûn seke seba tatbîqkerdene ney, seba nêtatbîqkerdene vejîyayo: “Qanûnî PKK kategorîze kerde; Rayber Apo û 800 îdarekar û qadroyî kewtî teberê ci. Tesbît û teyîd bi çekanronayîşê her kesî girê dîyayo; no nêyeno tatbîqkerdene. Tirkîya amade nêasena ke PKKyî bigîro xo mîyan; vanê ‘wa PKK çin bibo, bibo dû’. La PKK qewetêk, îradeyêk o; îradeyo tewr pêt ê 60 mîlyon kurdan o. Komara Tirkîya bi rewşa xo ya hende tekperest û înkarker senî nê qewetî bigîro xo mîyan? Seba ney ganî bivurîyo, demokratîk bibo; hewceyê qanûnanê neweyan est o.”
Kalkanî vat ke eke konseyêk bêro awankerdene, ganî Rayber Apo koordînatorê ci bo – Koordînatorê Prosesê Haştî û Sîyasîbîyayîşî, endamêkê komîsyonê bêçekbîyayîşî ney – û kilîtkerdişê mesele bêçekbîyayîşî, xetimnayîşê prosesî ser o yo: “Serrêk û nêm o Tirkîya de tu pêkewtiş çin o, ma qewetê xo heme waranê pêkewtişî ra antî, 30 embazan çekê xo veşnayî. Rayîrê PKKyî yê Tirkîya bê cîyakerdiş ganî abîyo, ganî ê sîyaset bikerê. Eke Rayber Apo bieşko xebata sîyasî biramno, heme gerîlayê koyan çekan ronanê û yenê rêxistina ey. Ma çîyo ke kewt ma ser o kerd, la sînorê ma est o; her çî ma ra nêro pawitene. Bi heme çîyan reyde Prosesê Haştî û Komelê Demokratîkî rew yan erey sernêkeweno – ma nê warî de qerardar ê.” Ey hemverê prosesî sey “ranthes” name kerdî ke prosesî red kenê la herinda ci de tu çî nêanê: “Ê çi wazenê? Kurdî şer bikerê, ê rant bigîrê? Wina nêbeno.” Ey venga heme beşanê komelî da ke têkoşînê ekolojî, feqîrî û vera şerê taybetî bi prosesî reyde girê bidê û bingeyê azadîya fîzîkî ya Rayber Apoyî ser o çalakîyan gird bikerê.
Kalkanî derheqê Rojawanî de vat ke qetlkerdişê Sîpan Hiznî provokasyonêk bî, dima tepişteyî hepisxane de ameyî veşnayene û Heleb ra Kobanê eskerî ameyî şawitene: “Bi provokasyonan welat nêyeno îdarekerdene. Kes wa nêfikirîyo ke kurdê Rojawanî terseno yan bêwayîr o. Îdareyê Şamî îradeyê herêmkî û îradeyê kurdan red keno; qedexekerdişê perwerdeyê bi kurdkî jenosîd û asîmîlasyon o. Wa tu gedeyêkê kurdî nêşêro perwerdeyêko ke kurdkî nîyo.” Derheqê Îranî de ey Jîna Emînî û şehîdanê serewedartişê “Jin Jiyan Azadî” ardî vîrî û vat ke rejîmê Îranî nêeşkeno statukoyo verên dewam bikero, Amerîka û Îsraîl zî nêeşkenê hegemonyayêka newîye awan bikerê; peynî de pêkerdişêk beno ke demokrasî tede vernî de ya. Ey ard ziwan ke şerê Îranî vila beno û Tirkîya merkezê ci de ya: “Eke Prosesê Haştî û Komelê Demokratîkî ser nêkewo, Tirkîya bi temamî teslîmê na hegemonya bena. Dermano tekane demokratîkbîyayîşo bingeyê azadîya kurdan o.”
Kalkanî peynî de yadkerdişanê şehîdan ê hewteyanê peyênan sey “vejîyayîşêko newe” nirxnayî û Apê Mûsa (serrgêra 34.), şehîdanê Xakûrkê yê 2011î, Dîlan û Riza Altun ke 25ê êlule 2019î de şehîd bî, ardî vîrî: “Şehîdê ma mamostayê ma yê tewr girdî yê; ê ma perwerde kenê, rêxistin kenê û pêşengîya ma kenê.”
