Buroyê Huqûqî yo Seserrî vera manîpulasyonanê ke Rayberê Şarê Kurdî û Prosesê Haştî û Komelê Demokratîkî hedef gênê, reaksîyon da û waşt ke seba ke dormeyê lêminî destê xo biancê, Abdullah Ocalanî rê statu bêro dayene.
Buroyê Huqûqî yo Seserrî vera manîpulasyonanê ke mûwekîlê ci Abdullah Ocalan û prosesî hedef gênê, eşkerayîyêka nuştekîye daye. Buroyî bale ante ser o ke meseleya kurdan ke bingeyê xo yo tarîxî û sîyasî nêzdîyê di seserran o, nika demêk ra vîyarena ke tede cehd yeno kerdene ke mesele çarçewaya pêkewtiş û şîdetî ra bivejîyo û zemînê sîyasî û huqûqî de bêro destgirewtene.
Eşkerayîye de ame vatene ke demêk o dormeyê cîya-cîyayî vera Rayberê Şarê Kurdî Abdullah Ocalanî ke aktoro bingeyin ê nê prosesî yo, vatişanê manîpulatîf û provokatîfan vila kenê: “Nê vatişî îfadeyê tepşêk o ke wazeno cigêrayîşê aramî û demokrasîya komelî têmîyan bikero; ê hêrsbîyayîşî ra yenê ke pêkewtiş û şîdetî qedîyenê. Êyê ke tewr zaf aciz benê, ê nîyê ke vîyarteyî de bedelê pêkewtişî dayî. Êyê ke keyeyanê bêsiwaxan ser o hamaset virazenê û konforê xo ra tawîz nêdanê, pawenê ke merdimê nê keyeyan reyna bedelan bidê; no bazirganîya gonî ya.”
Buroyî dîyar kerd ke Rayberê Şarê Kurdî Abdullah Ocalan bi felsefeya “Jin, Jiyan, Azadî” azadîya cinîyan sey esasê azadîya komelî vîneno û zîhnîyetêko nîjadperest û dişmenê cinîyan ke keye bi keye gêreno û muhacîran perseno, nêeşkeno bireso na sewîye. Buroyî vat ke munaqeşeya “awaniya” Îmrali zî dewamê eynî nêzdîbîyayîşî yo: “Na awanî ke seba averşîyayîşê xebatanê sîyasî û huqûqî yê prosesî hewce kena, çarçewaya xo ra ameyo vetene û bîyo malzemeyê provokasyonî. Rayberê Şarê Kurdî Abdullah Ocalan mîyanê komelê kurdan de şexsîyeto ke hêzê temsîlî, bawerîye û piştîdayîşê ey tewr berz o. Coka eşkera yo ke hedefê esasî yê kampanyaya ke şexsê ey de yena ramitene, şarê kurdî yo. Ma nê tewir cehdan red kenê.”
Buroyî ard ziwan ke seba nê sebebî munaqeşeya statuyî muhîm û biqîymet a: “Ganî îmkanê ey bêrê viraştene ke Rayberê Şarê Kurdî Abdullah Ocalan rayîrê haştî bimojno. Statu, îmkanê nê yo ke komel her çî rasterast muxatabî ra û bi şefafîye bimuso. Statu eynî wext de no yo ke nê dormeyê lêminî destê xo gan, aramî û erjanê komelî ra biancê. Ma do goreyê çarçewaya huqûqî cewab û cehdanê xo dewam bikerê; ma do her şertî de huqûqê Rayberê Şarê Kurdî Abdullah Ocalanî, huqûqê kurdan û huqûqê heme bindestan bipawê.”
