Ridvan Karakoç serra 1995î de amebî destbendkerdene û kiştene. Hasan Karakoç o ke derheqê vînkerdişê birayê xo de qisey kerd, dîyar kerd ke no 31 serrî yo ê seba ke faîlî bêrê vînayene têkoşîn kenê û wina vat: “Atîlla Ugur zî kiştoxê vîndîbîyayan o. Gelo ê do ci ra bipersê ke çi ardo serê vîndîbîyayan. Ma wazenê ke ceza bidîyo Atîlla Ugurî.”
Atîlla Ugur serranê 90î de Mardîn û zaf şaristanê Kurdîstanî de sey eskerî wezîfedar bî. Qoser de kiştişê 22 merdiman de ca girewt û vîndîkerdişê seyan merdiman de rolê ey est o. Atîlla Ugur dewaya JÎTEM’î ya Qoserî de ame muhakemekerdene. Şahîdo nimite yê ê demî derheqê Atîlla Ugurî de nê çîyî vatbî: “Fermandarê Cendirmeyan ê Qezaya Qoserî Hasan Atîlla Ugur û tîma ey tîya de dewî kerdî veng û îşkence ro zaf kesan kerd.”
Atîlla Ugur û tîma ey a bi nameyê ‘Ekîbê Kardî/Biçak Tîmî’ zaf kesî destbend kerdê û zafê nê kesan zî hetê înan ra ameyê kiştene û vîndîkerdene. Vera vîndîbîyayîş û kiştişan bi serran o ke şarê kurdî û dostê înan têkoşîn kenê. Îstanbul de bi serran o ke keyeyê vîndîbîyayan Meydanê Galatasaray de aqûbeta kesanê vîndîkerdeyan persenê. Nê keyeyan ra yew zî Keyeyê Karakoçî yo. Ridvan Karakoçî o ke serra 1995î de amebî destbendkerdene û kiştene. Birayê Ridvan Karakoçî Hasan Karakoçî derheqê vîndîkerdişê birayê xo û destbendkerdişê Atîlla Ugurî de Ajansê Welatî rê qisey kerd.
‘Birayê mi remna û bi îşkence kişt’
Hasan Karakoçî dîyar kerd ke no 31 serrî yo seba birayê xo têkoşîn kenê û wina qisey kerd: “Seba ke faîlî bêrê vînayene bi serran o ma xover danê. Dima ke 31 serrî derbaz bîyî, dewa birayê mi de qerarê vîyartişê demî ameye dayene. Ma rê vanê çîyêko ke ma bikerê çin o û tehqîqat qedîyayo. Birayê mi remna û bi îşkenceyî kişt. Waştişê ma no bî ke kesê ke birayê mi û sey birayê mi ciwanê kurdan kiştê, bêrê vînayene. Labelê çi heyf ke no 31 serrî yo ke dosyaya birayê mi Fermandarîya Cendirmeyan a Beykozî de bîye. Dima 31 serran serdozgêrîye vana ke derheqê kiştoxan de tu agahî nêameya destkewtene. Dozgêrîye dewa erşawena cendirmeyan, cendirme zî dozgêrîye rê erşawenê, no 31 serrî yo wina dewam keno. Serra 2018î ra nat zî qet averşîyayîşêk nêbi û dosya ameya vindarnayene. Nika zî qerarê vîyartişê demî ame dayene. La ma nê qerarê vîyartişê qebul nêkenê.”
‘Ganî Atîlla Ugur bêro muhakemekerdene’
Heto bîn ra Hasan Karakoçî bale ante destbendkerdişê Atîlla Ugurî ser û ard ziwan ke ewro destbendkerdişê Atîlla Ugurî çîyêko balkêş o û peynîya qiseykerdişê xo de wina vat: “Seba Mehmet Agarî zî cipersayîş amebî dest pêkerdene. La çi heyf ke dima yew dewa tena yew cezayo qijkek amebî dayene. Derheqê kiştişê bi desan merdiman de qet cipersayîş nêame kerdene û rewşa tu kesî nêvete werte. Ewro bawerîya mi qet çin a ke raştîye vejê werte.
Wereka cipersayîş biresayene peynî û ceza bidayene. Atîlla Ugurî zî do vejê verê mehkema û cezaya çend aşman bidê ci. Atîlla Ugurî bi seyan merdiman rê îşkence kerdo û kiştî. Atîlla Ugur o wext mîyanê ‘Ekîbê kardî’ de ca girewtbî û Qoser de vatbî: ez heqê nê cayî ya. Mardîn de zaf kesî kiştî. Çalakîya Dayîkanê Şemeyî de ê kesê ke ma fotografanê înan berz kenê zî mîyanê merdimanê ke Atîlla Ugurî kiştê de estê û faîlê înan zî Atîlla Ugur o. Ma wazenê ke ceza bidîyo Atîlla Ugurî û sucê ey bêrê aşkerekerdene. No 31 serrî yo ma seba ke faîlî bêrê vînayene têkoşîn kenê. Bi hezaran merdimî kiştî û vîndî kerdî. Ganî dewlete nê kiştoxan ra hesab biperso.”
