Cipersayişê mergê endamê MÎT’î Kaşîf Kozînoglû de, derheqê 4 kesan de qerarê destbendkerdene ame dayene. Nê kesan ra yew o ke derheqê ey de qerarê destbendkerdene ameyo girewtene kiştoxê 22 Kurdan, berpirsîyarê JÎTEMê Qoserî û vêşnayene û talkerdena dewanê Kurdan; Hasan Atîlla Ugur o.
Endamê MÎT’î Kaşîf Kozînoglu di serra 2011î de Hepisxanê Marmarayî de cuya xo ra bîbî. Serdozgerîya Konarî yê Sîlîvrîye derheqê mergê Kozînoglû de cipersîyayiş dabî destpêkerdene. Çarçewaya cipersayişî de derheqê 4 kesan de qerarê destbendkerdene ame girewtene. Nê kesan ra yew zî kiştoxê Kurdan, berpirsîyarê vêşnayîşê dewanê Qoserî û Dêrike û faîlê doza JÎTEMî yê Qoserî Hasan Atîlla Ugur o. Gorê agahîyanê ke ameyê destkewtene; Hasan Atîlla Ugur Kibris de yo û nêameyo destbendkerdene.
Hasan Atîlla Ugur kam o?
Hasan Atîlla Ugur fermandar o teqawutbîyaye yê cendirmeyan o. Serranê 90î de ke fermandarê JÎTEMî bî xeylî cayanê Mardînî de gureya bî. Demo ke Qoser de berpirsîyar bî, 22 kesî bi metodêko guman ameyî vindîkerdene. Îstîxbaratê Cendirmeyan û Têkoşînê Terorê (JÎTEM)î serranê 90î de Bakurê Kurdîstanî de bi metodêko nefermî kerdenê hovkî dayî ramitene. Zaf kesî peynîya nê kerdenanê JÎTEMî de ameyî kiştene û vîndîkerdene. Goreyê pawitoxanê heqê mordemîye û Baroya Amedî Hasan Atîlla Ugur, berbirsîyarê nê kesan û babetan ra yew o.
Hasan Atîlla Ugur Dewaya JÎTEMî yê Qoserî de sey verguman ame mahkemekerdene. O na dewaye de sey vergumanê kiştena 22 welatijanê Kurdê ke mîyanê serranê 1992-1996î de bi metodêko guman amebî kiştene. Bi sûcanê ‘Awankerdena rêxistina çekdar e’, ‘Kiştenê plankerdêyî’ ame mahkemekerdene. Temamê nê sûcan de Hasan Atîlla Ugur nê mahkemeyî de seba ke kemîbîyayîşê daneyan û vîyartena wextî ame beraetkerdene. Reyde bîn ame dîyayene ke heme sûckerdeyî dîyarê la dewlete seba menfeetanê xo yê wextî pawena. Yew tira teberê huqûqî a bîye ke Hasan Atîlla Ugur wexto ke Rayberê Şarê Kurdî Abdullah Ocalan ame girewtene, Girawa Îmralîyî de cipersayişo ewil kerd bî.
