Dayîkanê Şemeyî têkildarê qerarê vîyartişê demî yê dewaya Ridvan Karakoçî de eşkerayîye daye. Eşkerayî de ame dîyarkerdiş ke sucanê merdimîye de vîyartişê demî mimkun nîyo û wina vat: “Vîndîkerdişê bi hawayê zorî sucê vera merdimîye yo. Ma wazenê ke îtîrazî bêrê qebulkerdene û berpirsîyarî bêrê muhakemekerdene.”
Dayîkanê Şemeyî derheqê qerarê viyartişê demî yê doza Ridvan Karakoç o ke serra 1995î de amebi destbendkerdene û kiştene, verê Edlîyeya Anadolûyî ya qezaya Kartalî de eşkerayîye daye. Dayîkê Şemeyî, endama heyetê Îmralîyî ya DEM Partî Pervîn Bûldan, parlamenterê DEM Partî û xeylê pawitoxê heqanê merdiman tewrê eşkerayîye bîyî.
Eşkerayîye hetê Hemsereka Pêroyî ya ÎHDyî Oya Ersoye ra ameye wendene.
‘Bi serran o ma peyê heqîqetî de bî’
Oya Ersoye dîyar kerd ke sîstemê muhakemekerdişî yo herêmî qerarê viyartişê demî dano û wina qisey kerd: “Dewaya Ridvan Karakoçî yo ke bi serran o ma peyê heqîqetê ey de bîyî, qerarê vîyartişê demî ameye dayene. Wexto ke ma ewnîyenê dosya ra, sey kesê ke bi zorî ameyê vîndîkerdene eyn, rewşe vejîyena meydan û berpirsîyarî wezîfeyanê xo bica nêanê. Ridvan Karakoç zanayene ke do bêro destbendkerdene. Sîyasetê kurdî de bi tewrêkê aktîfî cayê xo girewtêne, bi desan rey amebî destbendkerdene. Seba nê sebebe verê ke bêro destbendkerdene vekalet dabî avukatê xo. Cenazaya Ridvan Karakoçî 2yê adara 1995î de Deva Bozhane ya qezaya Beykozî de, serê rayîrê Mahmut Şevket Paşayî de ameye vînayene. Teberê ci de ke derheqê ey de dewa zî bîye, cenazaya Ridvan Karakoçî goristana bêwayîran de ameye definkerdene. Otopsî de vejîya werte ke îşkence Ridvan Karakoçî rê ameyo kerdene.”
‘Dozgerîye dosyaye de game nêeşta û delîlê kemî nêameyî arêdayene’
Peynîya eşkerayîye de Oya Ersoy da zanayene ke cenazaya Ridvan Karakoçî 30ê adare de hetê birayê ey Mehmet Karakoçî ra ameye teşhîskerdene û vat: “Zabitê ke wexto Ridvan ame vînayene de dîyar o ke cilî serê ey de estê. Labelê çaxê ke ma dosyaye de ewnênê, serê cilanê Ridvanî de tu cigêrayîş nêameyo kerdene û testê DNAyî zî nêameyo kerdene. Keyeyê Karakoçî û avukatê ey waşt ke kesê ke dosyaye de nameyê înan vîyareno bêrê goşdarîkerdene. Kesê ke ameyî goşdarîkerdene derheqê vîndîkerdiş û kiştişê Ridvan Karakoçî deagahîyê muhîmî dayî. Labelê dozgerîye dosyaye de game nêeşta û delîlê kemî nêameyî arêdayene. Eşkera yo ke dosyaye ameye girewtene. Ma reyna veng danê ke sucanê merdimîye de qerarê viyartışê demî mimkun nîyo.
Bi hawayê zorî vîndîkerdiş vera merdimîye suc o. Ma wazenê ke îtîrazî bêrê qebulkerdene û berpirsîyarî bêrê muhakemekerdene.” Wendişê eşkerayîye ra dima çalakî qedîya.
