Çalakîyê Merdimê Vîndîbîyayan û ÎHD’yî yê seba aqûbetê vîndîbîyayan ke her hewte yeno virazîyayene, dewam kerd. Çalakîya Amed û Êlihî de aqûbetê Parlamenterê DEP’î yê Mardînî Mehmet Sîncar, Metîn Ozdemîr û Hatîp Kiliç, yê ke 4ê êlula 1993î de Êlih de ameyê kiştene û çalakîya Colemêrgî de zî aqûbetê 5 şiwananê ke 24ê tebaxa serra 1996î de dewa Xenanisê ya girêdayî Colemêrgî de hetê leşkeran ra ameyê destbendkerdene û vîndîkerdene, ameyê persayene.
Merdimê Vîndîbîyayan û Şûbeyanê ÎHD’yî yê Amed, Êlih û Colemêrgî de çalakîya hewtane ke waştişê vînayîşê vîndîbîyayan, muhakemekerdiş û girewtena kiştoxan kenê, dewam kerd.
Merdimê Vîndîbîyayan û temsîlkaranê Şûbeya ÎHD’yî ya Amedî çalakîya xo ya ‘Wa vîndîkerdeyî bêrê vînayene faîlî bêrê muhakemekerdene’ hewteyo 917. de verê Abîdeyê Heqê Cuye yê Parka Koşuyolu ya qezaya Rezanî ya Amedî de viraşt. Pawitoxê heqê merdiman, endam û temsîlkaranê sazgehanê sîvîl yê komelkî û merdimê vîndîbîyayan tewrê çalakîye bîyî. Çalakîye de fotografê kesanê ke ameyê vîndîkerdene ameyê girewtene. ÎHD û merdimê vîndîbîyayan çalakîya nê hewteyî de aqûbetê Parlamenterê DEP’î yê Mardîn Mehmet Sîncar, yo ke 4ê êlula 1993î de Êlih de ame kiştene, persa.
Çalakîye de endamê ÎHD’yî ya şûbeya Amedî Yakûp Guvenî û cinîya Mehmet Sîncarî, Cîhan Sîncare qisey kerd.
‘O temsîlkar û endamê xeta azadîye bi’
Yakup Guvenî dîyar kerd ke Mehmet Sîncar sîyasetmedarêko Kurdîstanî û parlamenterê înan bi û wina vat: “O temsîlkar û endamê xeta azadîye bi. Mehmet Sîncar, seba ke Kurdêko welatparêz bi û waştêni şarê xo bipawo, ame hedefgirewtene û kiştene. Keye, embaz û gedeyê Mehmet Sîncarî ser o zî zextî ameyê kerdene.”
‘Zêdeyêrê 30 serrî yo ke dewa nêameya çareserkerdene’
Cîhan Sîncare zî ard ziwan ke serê înan berz o û wina domna: “Ma proseso ke tera derbaz benê, merdimê ke 33 serrî yo ke parlementerî zî kerdo, çinî yenê hesibnayene, tarîxê înan yeno veşnayene û birîndarkerdene. Ez zî sey merdimêka nê welatî seba ziwanê xo, azadîya xo û şarê xo waştişê edaletî kena. Dewaya Mehmet Sîncarî de ke zêdeyêrî 30 serrî yo ke nêameya çareserkerdene, êdî wa edalet bêro caardene. Hem sersaxîyanê ma de hem zî vîrardişanê ma de waştişêko ma o tena esto, heme heqê ma yê ke ameyê binpaykerdene, herra ma û nasnameya ma bi edaletî ra bibê yew.”
Badê qiseykerdişan hîkayeya vîndîkerdena Mehmet Sîncarî hetê temsîlkarê herême yê ÎHD’yî Tahîr Saçakli ra ame wendene.
Tahîr Saçakli zî dîyar kerd ke cigêrayîşê pawitoxanê heqê merdiman ê seba edalet û raştîye do qet nêqedîyo.
Eşkerayîye bi çalakîya roniştişî qedîya.
Êlih
Merdimê Vîndîbîyayan û temsîlkaranê Şûbeya Komeleya Heqê Merdiman (ÎHD) ya Êlihî hewteyo 753. de çalakîya ‘Wa vîndîkerdeyî bêrê vînayene û faîlî bêrê muhakemekerdene’ verê Abîdeyê Heqê Merdiman ê Cadeya Gulîstane de aqûbetê Parlamenterê DEPî Mehmet Sîncar, Metîn Ozdemîr û Hatîp Kiliç, yê ke 4ê êlula 1993î de kuçeya Elma ya bazarê Êlihî de ameyê kiştene, persa. Çalakîye de temsîlkar û endamanê ÎHD’yî û Merdimê Vîndîbîyayan û xeylî kesî amade bîyî û fotografê kesanê ke destbendkerdişî de ameyê kiştene û vîndîkerdene girewtê.
Temsîlkarê ÎHD’yî yê Êlihî Îhsan Onelî hîkayeya kiştena Mehmet Sîncar, Metîn Ozdemîr û Hatîp Kiliç wend.
Eşkerayîye bi çalakîya roniştişî qedîya.
Colemêrg
Şûbeya Komeleya Heqê Merdiman (ÎHD) ya Colemêrgî û Merdimê Vîndîbîyayan çalakîya ‘Wa vîndîkerdeyî bêrê vînayene, faîlî bêrê muhakemekerdene’ hewteyo 243. de kuçeya Hunerî yê Geverî de viraşt. Nê hewteyî de pawitoxanê heqê merdiman aqûbetê 5 şiwananê ke 24ê tebaxa serra 1996î de dewa Xenanisê ya girêdayî Colemêrgî de hetê leşkeran ra ameyê destbendkerdene û vîndîkerdene, persa.
Eşkerayîye ÎHD’yî hetê Hemsereka ÎHD’yî ya Colemêrgî, Sîbel Çapraz ra ame wendene. Eşkerayîye de ame dîyarkerdene ke 30 serrî yo ke kiştoxê 5 şiwanan nêameyê vînayene û muhakemekerdene.
Eşkerayîye bi çalakîya roniştişî qedîya.
