Girtiyê nexweş Mehmet Saîd Yildirim ku ji sala 1995an ve girtî ye, krîza dil derbas kir û dema tehliyeya wî cara sêyemîn ji bo 3 mehan hate dirêjkirin. Hate zanîn ku Yildirim rakirine nexweşxaneyê û li beşa lezgîn tê dermankirin.
Girtiyê nexweş Mehmet Saîd Yildirim ku ji sala 1995an ve girtî ye, vê şeveqê krîza dil lê daye. Saîd Yildirim ê ku li Girtîgeha Jimare 1ê ya Kiriklarê YA Îzmîrê tê ragirtin, vê şeveqê krîza dil lê daye û wî rakirine Nexweşxaneya Bajêr a Îzmîrê. Derbarê rewşa tenduristiya Yildirim de agahiyên berfireh nehatin bidestxistin û hate zanîn ku tedawiya wî li beşa lezgîn didome.
Li aliyê din dema berdana girtiyê nexweş ê giran Mehmet Sait Yildirim 25ê Tebaxê îro bû. Li gorî agahiyên me ji malbata Yildirim wergirtin, hate zanîn ku berdana wî ji bo 3 mehên din hatiye dirêjkirin.
Diviyabû Yildirim di Sibata 2025an de bihata berdan. Lê ev cara sêyemîn e ku berdana wî taloqkirin.
Derbarê Saîd Yildirim de
Saît Yildirim di Sibata 1995an de hate girtin û ji aliyê Dadgeha Ewlehiya Dewletê ya Amedê (DGM) ve cezayê muebedê lê hate birîn.
Li ser daxwaza Rêberê PKKê Abdullah Ocalan, di 15ê Adara 2015an de Yildirim di çarçoveya “Peywira sekreteryayê” de biribûn Girtîgeha Tîpa Fyê ya Ewlekariya Bilind a Îmraliyê. 9 roj piştre di 25ê Adarê de ji ber pirsgirêkên tenduristiyê yên weke dil û KOAH yên Yildirim, ew ji Îmraliyê anîbûn Girtîgeha Tîpa Fyê ya Boluyê.
Ji ber nexweşiya dil, Yildirim pêşî sewqî Girtîgeha Tîpa Fyê ya Boluyê, paşê jî sewqî Girtîgeha Tîpa Dyê ya Amedê û Tîpa Tyê Odemişê ya Îzmîrê hatibû kirin. Di 6ê Îlona 2018an de ji bo Girtîgeha Jimare 1ê ya Kiriklarê hate şandin. Bi salan e bi “fermana Wezaretê” di hucreya yekkesî de tê girtin.
Pirsgirêkên tenduristiyê yên Yildirim yên wekî fitiqa sitû, tansiyona zêde, nexweşiya dil a arteriosklerotîk, KOAH û nexweşiya damaran heye.
