ÇEWLÎG – Hemsereka DBP Çigdem Kiliçgun Uçar, merkezê Çewlîg de şarê reyde ame têhet û vat: “Bizanê ke qanunê çarçewa tena destpêkê aştî û azadîya ma yo.”
Hemsereka Pêroyî ya Partîya Herêmanê Demokratîkan (DBP) Çigdem Kiliçgun Uçare û temsîlkarê DBP’yî çarçewaya têhetameyîşanê “Ma şarî reyde qalê aştîye kenê” de merkezê Çewlîg de, roja hîrêyîne xebatanê xo domnenê.
Çigdem Kiliçgun Uçar, bale ante nêzdîbîyayîşê dewlete yê vera şarê kurdî û wina vat: “Dewlete vana ke şarê kurdî çino no welat de. Se serrî yo ke şarê kurdî vano ma estê, kamîya ma esta, îtîqatê ma esto, ma ra meterse.”
Çigdem Kilicgun Uçar qiseykerdişê xo wina domna: “Zihniyetê nê îqtîdarî vano ke, Kurdîstan bêmerdim bimano, şarê kurd zî bêwelat bimano. Miîyanê pancas serran de hem perodayîşê ma hem vindertişê ma, hem zî keda ma ewro çîyêke dîyar kerd. Aqlê dewlete û îqtîdarî vano ke, heta nika ma vatêne tehdît ê, heta nika ma vatêne ke eke kurd bibê, bekaya na dewlete kewena tehluke. Nika se vanê? Vanê ke beka birayîya, wa birayîya Tirk û Kurdan bibo. Na vatene de zanî ke emegê şima esto, na vatene de bizanî ke kedê şima û bawerîya şima esta.
Ewro yew qanûnê çarçewayî virazîya. Bizanê ke no qanûnê çarçewayî, tena destpêkê aştî û azadîya ma ya. Ma nêvajê ke a belge tena ma rê aştîye ano, wina nîyo. No belge de ma vînê ke hetanî nika Kurd û Tirkî çi bî, hetanî ma nêvaje, raşt nîyo. Dewlete verê kurdan de çi bî, pêrodayîş bî, pêkewtiş bî. Eke pêkewtiş qedîya bi qanûnê çarçewayî ma eşkenê bi hawayêko demokratîk û aştîye yewbînan de qisey bikerê ü ameyoxê xo pîya awan bikerê.”
Program badê persan û cewaban qedîya.
