Ciwanê bi nameyê Hejar Başer, Mazlûm Dogan Sarikaya û Fûrkan Koç ke vizêrî bi manaya ‘Vejiyayîşê vera qanûnê rayîrşîyayîş û çalakîyan’ ameyî girewtene, zindan ra mesajî erşawitî û dîyar kerd ke ê û kesê ke seba madeyanê hişbiran ameyî girewtene, eynî oda de yenê girewtiş.
Grûba Hetgiranê Amedsporî ya bi nameyê KuçeAmed û ciwanan seba paştîdayena gama ‘Wurzê’ ke Platformê Şîyar Be vera hişbir û fihûşî dabî destpêkerdiş, Meydanê Batikentî yê qezaya Yenîşehîrî ya Amedî de 5ê tebaxî de seba hîrê rojan çalakîya nobete viraşte bî. 6 ciwanê ke tewrê çalakîya nobete bîbî, 9ê tebaxe de amebî destbendkerdene.
Ciwanê bi nameyê Hejar Başer, Mazlûm Dogan Sarikaya, Mûhamed Şakar, Fûrkan Koç, Mûrat Aslan û Suleyman Ay ke Mudirîyetê Polîsan ê Amedî de îfadeyê înan amebî girewtiş, vizêrî sewqê edlîye ameyî kerdene. Ame dîyarkeriş ke ciwanî bi îdiaya ‘Vejîyayîşê vera qanûnê rayîrşîyayîş û çalakîyan’ û ‘birîndarkerdişî’ ameyê destbendkerdene. 6 ciwanê ke tewrê sewqê edlîyeya Amedî amebî kerdene înan ra Hejar Başer, Mazlûm Dogan Sarikaya û Fûrkan Koç bi eynî îdiayan ameyê girewtene û erşawitê zindanê Amedî.
‘Çi beno wa bibo, ma do nê şaristanî polîtîkayanê şerê taybetî ra pak bikerê’
Hejar Başer, Mazlûm Dogan Sarikaya û Fûrkan Koç bi raya avûkatanê xo zindanê amedî ra mesaj erşawitî.Ciwanan mesajê xo de ard ziwanê ke seba ke vera madeyanê hişbirî vindertê, sey cezayêk ê erşawitê zindan û da zanayîş ke nika mîyanê kesê ke madeyanê hişbiran ra ameyê girewtene de yenê girewtiş. Ciwanan mesajê xo de dîyar kerd ke çi beno wa bibo, ê do nê şaristanî polîtîkayanê şerê taybetî ra pak bikerê.
‘Ma sereberz ê’
Hejar Başerî mesajê xo de wina vat: “Ma semedê ke vera rotoxanê madeyan vindertî û ma embazanê xo yê ciwanî girêdayeyê madeyanê hişberan ra dûrî kerdî, ma kerdî hedef û ma girewtî. Ma sereberz ê û ma zanê ke teber de bi hezaran embazê ma do têkoşînê ma dewam bikerê. Ma baş ê û bimoral ê. Şertî çi benî wa bibê, ma do nê şaristanî polîtîkayanê şerê taybetî ra pak bikerê. Biciwîyo Xoverdayîşê Ciwanan.”
‘Sereyê ma sey Koyê Zagrosî berz o’
Mazlûm Dogan Sarikaya zî mesajê xo de veng da ciwanan û wina vat: “Selam pêro ciwanan rê. Vengdayîşê ma seba pawitişê şar û ciwanan o. Sereyê ma berz o sey Koyê Zagrosî, zerrîya ma pak a sey Cîlo û Çarçela. Ma keyfweş ê û ma do têkoşînê xo pîl bikerî. Dewaya ma giran a, ma do xover bidî.”
‘Biciwîyo xoverdayîşê ciwanan’
Fûrkan Koçî zî mesajê xo de qalê rewşa xo û embazanê xo kerd û wina vat: “Ez ewro nê nuşteyî bi sereberzî nusnena. Ma şima ra zî vindertişêk winasî wazenî. Qet mereq mekerê ma her hîrê zî sey şêran serê lingan de yê. Qet gumanê ma çin o ke şima do heqê ma bi tewirêko tewr rind bipawê. Biciwîyo xoverdayîşê ciwanan.”
