Aktîvîsta TJA Ayşe Gokkan hepîsxaneyî ra seba sipasî û piştîdayîşî mektubêk erşawit û wina vat: “No qerar, qerardarîya ma yê cigêrayîşê heqîqat, edalet û azadîye hîna zêde bihêz kerd. Ê ke piştî daya, ez spasîya xo hemine rê kena ke bîyê vengê ma. Piştîdayîş hêzê ma yo tewr gird o.”
Aktîvîsta Têgêrayîşê Cinîyanê Azadan (TJA) Ayşe Gokkan ke bi îdiaya ‘endamtîya rêxistine’ 19 serre û 6 aşmî cezayê hepsî aye rê amebî dayene, hepîsxane ra mektubêk raya pêroyî rê erşawit.
Ayşe Gokkan mektubê xo de kesê ke piştî daye, înan rê sipasî kerd û dîyar kerd ke têkoşînê seba azadî, seyyewbînî û cuya birûmet suc nîyo.
Mektuba ke Ayşe Gokkan hepîsxaneyî ra erşawit wina ya: “Dewaya ke bi îdiayê endamtîya rêxistine vera mi ameye akerdiş de hetê mehkema ra hemverê mi 19 serre û 6 aşmî cezaya ameye dayîş û qerarê dewamkerdişê girewtişê mi ame dayîş. No qeraro ke ameyo dayîş, bawerîya ma ya bi têkoşînê xo ya meşrû ke bi serran o warê heqê cinîyan û heqê merdiman de yena rayraberdiş, kêm nêkerda; eksê nê çî, qerardarîya ma ya cigêrayîşê heqîqetî, edalet û azadîye hîna zêde kerd. Roja yewin a dewa ra hetanî roniştişê qerarî, ez zerrî ra sipasîyanê xo pêşkêşê heme rêxistinanê cinîyan, rêxistinanê pêroyî yê demokratîk, pawitoxanê heqanê merdiman, huqûqnas, sazgehanê mîyandewletî yê heqanê merdiman, tesmsîlkaranê partîyanê sîyasî, kedkaranê çapemenî û kesê ke wayîrê wîjdanîyê kena ke prosesê nêzdî ra teqîb kerd; salonê roniştişî de, vernîya awanîya mehkema û her cayî ra piştîdayîşê xo mojna. No piştîdayîşo bihêz o ke ame mojnayîş, bîyo îfadeyêko manadar ê wayîrvejîyayîşê têkoşînê cinîyan seba seyyewbînî û azadîye, heqanê merdiman û waştişê edaletî.
Nê prosesî de her piştîdayîşêk, her mesajo ke ame erşwitiş û her vengo ke ame berzkerdiş, reyna dîyar kerd ke ma tena nîyê. Ma zanê têkoşînê cinîyan ê seba azadî, seyyewbînî û cuyêka birûmet suc nîyo. Bi na hêvîya ke piştîdayîşê gird kena, ma do her kesî reyde ke têkoşînê heq û azadîye rayra benê, mil bi mil têkoşînê xo bidomnê. Ez sipasîya her kesî kena ke piştî daya, bîyî vengê mi û hêvî gird kerd. Piştîdayîş hêzê ma yo tewr gird o.”
