Belgefîlmê “Rojeyê Ciwîyayîşî” o ke qalê Xoverdayîşo Tarîxî yê 14ê temmuze yê Zindanê Amedî keno û hetê hunermendanê TEV-ÇAND û Akademîya Sînemayê ê Rojhelatê Mîyanên ra ameyo hedrekerdene, 12ê temmuze de yeno weşanayene.
Koma xebata hempar a hunermendanê TEV-ÇAND û Akademîya Sînemayê ya Rojhelatê Mîyanênî, eşkera kerd ke amadekarîyê belgefîlmê “Rojeyê Ciwîyayîşî” qedîyayê. Nê belgefîlm ke sey sînematografî û vatişêko şaîrkî ameyo hedrekerdene de, qalê Xoverdayîşo Tarîxî yê 14ê temmuze keno û do 12ê temmuze de bêro weşanayene.
Koma xebate bi eşkerayîyêka nuştekî dîyar kerd ke qonaxê antiş û montajê yê belgefîlmê “Rojeyê Ciwîyayîşî” temam bîyî. Xebatê produksîyonê yê belgefîlmî ke qalê rojeyê mergî yê 14ê temmuza 1982î yo ke vera polîtîkayanê wehşetê hepisxaneyo leşkerî yê hûmara 5 ê Amedî amebi dest pêkerdene keno, hetê Art Recordsî ra ameyê kerdiş. Belgefîlmo ke bi kelecanêko gird yeno pawene ke ewro bêro weşanayene.
‘Ma deyndarê înan ê’
Eşkerayîya ke nameyê koma xebate ser ameye dayene de, bale ante vîrî tarîxî û amancê viraştişê berhemî. Dewamê eşkerayîye de wina ame vatiş: “Ma deyndarê înan ê! Bi nê belgefîlmî, ma qehremanê no xoverdayîşo bêemsal û karwanê azadîye ê ke rayîrê înan o birûmet de şîyî, bi rêzdarî yad kenê. Na xebate, seba xoverdayanê zindanan ê ke xo sey şopdar û wendekarê ê bêmergan vînenê, rêzgirewtişêke yo.”
‘Wehşetê serdemê û îradeyo gird bi sînematografîyeko tesîrkar ano ekranî ser’
Belgefîlmo ke antiş û xebatê ê yê teknîkî hetê Art Recordsî ra ameyê rayraberdiş, temaşekerdoxan anceno mîyanê xorînîya vîrgehî û têrîameyîşê raştîya zindanî. Belgefîlm, qalê hîkayeyê agêrayîşê şorişgirêko verên o ke badê demêko derg zindanî ra azad beno û bi serran ra dima agêreno Zindanê Amedî û kela xoverdayîşê “Qawişa 32”. Zîyareto bêveng ê girewteyo verên, bê dîyalogî, atmosferê îşkence û wehşetê serdemî û îradeyo gird ê vera êy, bi sînematografîyeko tesîrkar ano ekranî ser.”
‘Amanc, awankerdişê komelo azad o’
Koma xebate, bale ante rolê hunerî yê awankerdişê komelî ser û eşkerayî bi nê vatişan qedêna: “Nê prosesê muhîmî de, amancê ma bi xebatanê xo yê hunerî seba awankerdişê komelêko azad û demokratîk de hemkarî bikerê. Ma ganîverdişê mîrasê xoverdayîşê yê pêşengê nê têkoşînî birûmet, her wextî de hem vîrî xo de hem zî vîro kolektîf ê komelî de, sey wezîfeyêko tarîxî vînenê.”
