Bi Pêşengîya Meclîsê Ciwanan ê DEM Partî, qezaya Bismilî de seba awankerdişê hişmendîya komelkî yê vera xebatnayîşê hişbirî rayîrşîyayîşêk ame viraştene û çalakîya nobete ame dest pêkerdene.
Bi Pêşengîya Meclîsê Ciwanan ê DEM Partî, qezaya Bismilê ya Amedî de çarçewaya gama “Wirze” ê Platformê Şîyar Be Amed de vera xebatnayîşê tîryak û hişbirî; pratîkê çeteyî û fihuşî de çalakîya nobete ame dest pêkerdene. Çarçewaya nobete de seba awankerdişê hişmendîya komelî yê vera hişbir û fihuşî, Keyeyê Şînî yê Taxa Şentepe ra heta Goristanê TOKÎ rayîrşîyayîşêk ame viraştene. Hemşaredarê Bismilî Guven Tanrikûlû, rêxistinê DBP û DEM Partî yê Bismilî, endamê Meclîsê Ciwanan ê DEM Partî û xeylê kesî tewrê rayîrşîyayîş bîyî. Rayraşîyayîş de bi sloganê “Bismil ramekewê wayîrê ciwananê xo vejîye”, “Biciwîyo xoverdayîşê ciwanan”, “Wayîrê taxa xo vejîye”, “Wayîrê ameyoxê xo vejîye” ameyê eştene. Rexistinanê DBP û DEM Partî badê rayîrşîyayîşî verê çadira kê Taxa Şahîntepe de ameya akerdene eşkerayî da çapemenî.
‘Ma do game peyde nêerzê ameyoxê xo bipawê’
Destpêk de Hemsereka DBPî ya Bismilî Nerîman Bakir qiseykerdişê xo de dîyar kerd ke ey do heme taxan de çalakîyan virazê û heta ciwanî hişbir ra bixelisîyê ey do têkoşînê xo dewam bikerê. Badê ra Hemsereka DEM Partî ya Bismilî Halîse Erkek metnê eşkerayîye wend, bale ante serê polîtîkaya rizayîşê komelî û wina vat: “Qezaya ma de hişbir, çeteyî, fihuş çiqa şino zêdeyêr vila beno. Ciwanê ma hedef yenê girewtene. Wazenê ameyoxê ma tarî bikerê. Nê hêrişî tesaduf nîyê. Nê beşêke polîtîkayê şerê taybetî yê ke amanc kenê ke ciwanan bêheş, bêîrade bikerê û înan nasnameyê xo ra dûr bifînê. Ma vera nê sîstemî game peyde nêerzenê û ameyoxê xo pawenê. Ma vengdayîşê heme ciwananê Bismilî û şarê xo kenê ke nê têkoşînî û paştîdayîşî gird bikerê.”
Halîse Tekîn şarî dawetê çalakîya nobeta ke do 3 rojî dewam bikero, kerd.
