TUÎKê daxuyand ku enflasyona meha Tîrmehê ji sedî 1.78, enflasyona salane jî sedî 31.75 zêde bûye. Li gorî ENAGê ku ji akademîsyenên bêalî pêk tê, enflasyona meha Tîrmehê ji sedî 3.07, ya salane jî ji sedî 50.49 zêde bû.
Ji ber polîtîkayên aboriyê yên şaş û aloziyên siyasî ev demeke dirêj e ku enflasyon zêde dibe û bihayê pere her ku diçe kêmtir dibe. Saziya Îstatîstîkê ya Tirkiyeyê (TUÎK) ku bi giranî daneyên ne li gorî rastiya aborî amade dike, enflasyona meha Tîrmehê weke 1.78 aşkera kir. TUÎKê da zanîn ku enflasyon li gor sala borî ji sedî 31.75 zêde bûye. Koma Lêkolînê ya Enflasyonê (ENAG) ku ji akademîsyenên bêalî pêk tê jî diyar kir ku enflasyona meha Tîrmehê ji sedî 3.07 û ya salane jî ji sedî 50.49 zêde bûye.
