Serbestveradayîşê girewteyo nêweş ê giran Mehmet Sait Yildirimî di reyî amebi taloqkerdiş. Tarîxê peyên o ke seba serbestveradayîşî amebî dîyarkerdiş 25ê tebax o û a roje nêzdî bena. Parlamentera Şirnexî û Verfeka DEM Partî Ayşegul Dogan muracatê Wezareta Edaletî û Komîsyonê Heqanê Merdiman ê Parlamentoyî kerd û bale ante rîskê taloqkerdişêko newe yê kêfî û netîceyanê ey ê giranî ser o.
Girewteyo nêweş Mehmet Saît Yildirim serra 1995î ra nat zindan de yo. Demê tespîtkerdeşî yê seba serbestveradayîşî girewteyê nêweş o giran Mehmet Sait Yildirimî 25ê tebax o û no tarîx nêzdî beno. Serbestveradayîşê Yildirimî ke di reyî ame taloqkerdiş, gelo na rey do veradîyo yan ney, hewna dîyar nîyo. Keye û merdimê ey ê ke 33 serrî yo pawenê, hem biomid ê ke bêro veradayene hem zî fikarê înan est ê.
Ganî Saît Yildirim serre û nêm ra verê bêşert biameyêne tehlîyekerdiş, la serbestveradayîşê ey bi qerarê Heyetê Çimdarîye yê Serekîya Zindanî di reyî ame taloqkerdene. Her çend ke heqê ey ê serbestveradayîşî bişert 27ê sibata 2025î de bi zî, serbestveradayîşî ey verê seba 27ê kanûna verêne ya 2025î û dima zî seba 25ê tebaxa 2026î ame peydeeştiş. Heyetî her di qeraranê taloqkerdişî de sey maneyî vato ke Saît Yildirimî “ qayde û prensîbê zindanî nêardê ca” û “poşman nêbîyo.”
Persname û muracatê Ayşegul Dogan
Roja tehlîyeya Saît Yildirimî reyna nêzdî bîye û Parlamentera Şirnexî û Verfeka DEM Partî Ayşegul Dogan bi waştişê cewabdayîşê Wezîrê Edaletî persnameyêko nuştekî pêşkêşê Serekîya Parlamentoyî kerd. Heto bînî ra Ayşegul Dogan muracaê Komîsyonê Cigêrayîşê Heqanê Merdiman ê Parlamentoyî zî kerd û waşt ke rewşa weşîye ya Saît Yildirimî û wextê cezayî goreyê heqê cuye û heqê weşîye ser o bêro cîgêrayîş bêro kerdiş.
Her çend ke serê tarîxê serbestveradayîşî ra serre û aşmêk vîyarta zî, tena teqwîm nêvurîyayo; goreyê raporanê weşîye yê ke muracatanê Ayşegul Dogan de ca genê, bi taloqkerdişê serbestveradayîşî rewşa weşîye ya Mehmet Sait Yildirimî zî giranêr û xirabêr bîye.
Ayşegul Dogan muracatanê xo de vato ke nêweşîyê sey qelb, tansîyonê berzî, KOAH, huşkbîyayîşê damaran, fitiqê vile û nêweşîya pişikan Saît Yildirimî de est ê. Ayşegul Dogane bale ant naye ser ke SAît Yildirim nika êdî nêeşkeno lazimtîyanê xo yê rojane bîyaro ca û qiseykerdişê ey giran bîyo û şertanê zindanî de nêeşkeno biserûber bêro tedawîkerdiş.
Gonî ameya çimê Yildirimî ser o
Goreyê dosya, problemanê weşîye yê Saît Yildirimî tena bi nînan sînordar nîyê. Ame zanayene ke serê aşma temmuze de gonî ameya çimê ey ê raştî ser o û înan o bilez berdo nêweşxane. La wextê berdişî de waşto ke destanê ey kelemçe bikerê û bi nê qaydeyî kontrolê ey ê weşîye bikerê. Ame zanayene ke ser o hewteyêk vîyarto la problemê vînayîşê çimî yê Saît Yildirimî dewam keno û kontrolê ey ê weşîye nêbîyê. Heto bînî ra wextê tespîtkerdiş û tedawîkerdişê birînanê ke canê ey de virazîyê, o zî ameyo peydeeştiş.
Rewşa weşîye yê Yildirimî ameye rojevê Meclîsî
Ayşegul Dogan persnameyê ke pêşkêşê Parlamentoyî kerd, uca de tena behsê rewşa weşîye ya Mehmet Saît Yildirimî nêkerdo, sewbîna caardişê Heyetanê Çimdarîye yê Rayberîya Zindanan zî ardo ziwan. Persnameyê xo de persayo ke gelo serbestveradayîşê Saît Yildirimî do reyna bêro erjnayene yan nê, seba caardişê wextê sewqkerdişê nêweşxaneyî de tehqîqat ameyo akerdiş yan nê, serranê peyênan de hûmara girewteyanê ke bi maneya “prensîb û qaydeyê zindanî nêanê ca” û “poşman nêbîyo” serbestveradayîşê înan ameyo taloqkerdiş çende yo, nînan ra çend kesî nêweşê giran ê û gelo caardişê ke estê nika do reyna verê çiman ra bêrê derbaskediş yan nê. Ayşegul Dogan muracatê xo yê seba Komîsyonê Cigêrayîşê Heqanê Merdiman de zî waşt ke rewşa weşîye yê Saît Yildirimî zindan de bêro cigêrayîşkerdiş, bêro erjnayene ke gelo hetê tibî ra mendişê ey ê zindan de mûmkin o yan nê, ereykewtişê tedawî bêro cigêrayîşkerdene û sewbîna Ayşegul Dogan waşt ke şertê resnayene bêmabên ê xizmetanê weşîye bêrê viraştene.
Çi qewimîyabi?
Saît Yildirim sibata 1995î de ame girewtene û hetê Mehkemeya Asayîşê Dewlete ya Amedî (DGM) ra cezayê muebedî dîya ey. Bi waştişê Serekê PKK’yî Abdullah Ocalanî, 15ê Adara 2015î de Saît Yildirim çarçewaya “Wezîfeyê sekreterîyayî” de berdbî Zindanê Îmralîyî yê Ewlekarîya Berze yê Tîpê F’yî. 9 rojî ra pey 25ê adare de seba problemanê weşîye yê Saît Yildirimî yê sey qelb û KOAH’î, o Îmralî ra ardbi Zindanê Boluyî yê Tîpê F’yî. Seba nêweşîya qelbî, Saît Yildirim verê sewqê Zindanê Boluyî yê Tîpê F’yî, dima zî sewqê Zindanê Amedî yê Tîpê D’yî û Odemîşê Îzmîrî yê Tîpê T’yî ameybî kerdiş. 6ê êlula 2018î de seba Zindanê Kiriklarî yê Hûmara 1. ame erşawitiş. Bi serran o ke bi “Fermanê Wezaretî” hucreyê yewkesî de yeno girewtiş. Problemê weşîye yê Saît Yildirimî yê sey fitiqê vile, tansîyono berz, nêweşîya qelbî ya arterîosklerotîk, KOAH û nêweşîya damaran est a.
