ÇEWLÎG – Kanîreş de seba rewşa Mehmet Saît Yildirimî ke badê vejîyayîşê vernîya Heyetê Rayberî û Çimdarîye ya Hepisxaneyî krîzê zerrî derbaz kerd, eşkerayî ameye dayene. Eşkerayî de vera zordarîya tedawîya bi kelepçe nêrazîbîyayîş nîşan da û serbestveradayîşê Yildirimî bilez ame waştene.
Mehmet Sait Yildirim 75 serre yo girewteyo ke nêweşîya ey giran a, Hepisxaneyê F-Tîpî yê Asayîşo Berz ê Kirklarî yê Hûmara 1ê ya Îzmîrî de girewte yo. Mehmet Saît Yildirm 24ê Tebaxe de vejîyayo vernîya Heyetê Rayberî û Çimdarîye ya Hepisxaneyî û badê pêvînayîşî odaya xo de krîzê zerrî derbaz kerd. Dimayê heqê ey yê veradayîşê bi şertî raya hîrêyine seba hîrê aşman ame peydeeştene, memleketê ey Kanîreş de eşkerayî ameye dayene.
Rexistinanê DEM Partî û DBP’yî yê Kanîreşî eşkerayî daye, keye, merdîmî û xeylê welatî tewrê eşkerayî bîyî.
‘Tedawîya bi kelepçe vera rûmetê merdimîye yo’
Hemserekê DBPî yê Kanîreşî Ozkan Bingolî dîyar kerd ke heqê Mehmet Saît Yildirimî sibata 2025 ra seba veradayîşê bi şert bîbî, la veradayîşê ey ame asteng kerdene û vat: “25ê tebaxe de Yildirim bilez berdo anjîyo dîyar bî ke yew damara ey ya ke şina zerrî girewteya, naye ser di stendi damaranê ey ra girêdayê. Tewlê nê tabloyê giranî zî wextê dermankerdişî ey de personelanê cendirmeyan waşt ke bi kelepçe ranza ra girê bidê. No vera rûmetê merdimîye yo, reaksîyonan ser no caardiş ame asteng kerdene. Seba kesêko krîzêko giran derbaz kerdo û merg ra xelesîyayo, dermankerdişo bi kelepçe binpaykerdişêko eşkera yê heqan o. Ma wazenê ke Yildirim goreyê şertanê rûmetê merdimîye bêro derman kerdene û bilez bêro veradayene.”
‘Pratikê kêyfî goreyê prosesî nîyê’
Badê eşkerayî, endamanê keyeyê Yıldirimî qisey kerd. Birayê Mehmet Sait Yildirimî, Selim Yildirimî bi vîrardişê kesê ke têkoşînê azadîye de cuya xo ra bîyî, dest bi qiseykerdişê xo kerd û vat “Birayê ey hevalê Mazlûm Dogan û Hayrî Durmuşî bî seba ke tedaya poşmanîye qebul nekerda înfazê ey ame veşnayene. Vizerî Serekkomar Erdoganî Ahlat de vatênê wa heme kesî destek bidê nê prosesî, gelo ti helwestê kêfî yê dozger û heyetê xo nêvînenê? nê pratîke zordarî yê ke yenê rayraberdene goreyê prosesî nîyê.”
‘Nêro veradayene ma do grevê vêşanîye bikerê’
Waya Mehmet Saît Yildirimî Hanim Yildirime zî vera rewşa birayê xo nerazîbîyayîşê xo ard ziwan û wina vat: “Birayê mi nêweş o, anjîyo bîyo la hema zî wazenê destê ey kelepçe ro de. No zulim nêyeno qebulkerdene. Ma wazenê o demêko kilm de hepisxane ra vejîyo û kilitê kelepçeyan bêro akerdene. Ma bi serran o paweyê rayîrê ey de yê.”
O nêweş o, dewlete zî naye zana
Merdima Yildirimî Vacide Yildirime zî bale ante serê bedêlanê giranan ê ke keyeyî bi serran dayê û vat: “Ma no rayîr de canê xo da. Seba herra xo û seba kesanê ke ma reyde têkoşîn kerdo, ma wazenê Saît Yildirim demê ke kilm de bêro veradayene. Wexto ke mi eşnawit ey krîzê zerrî derbaz kerdo zerrîya mi veyşa. O nêweş o dewlete zî naye zana. Serra vîyarte de birayê ey seba hesreta ey krîzê zerrî derbaz kerd û cuya xo ra bîyî. Birayê bînî zî nêweş ê û paweyê ey ê. Eke o nêro veradayene ma do verê Mehkemaya Îzmîrî de dest bi grevê veşanîye bikerê.”
