Muracaatê verdayişê tepişteyê girannêweş Mehmet Sait Yildirimî, hetê Hakimîya Înfazî ya 2. ya Îzmîrî ra bi îdiaya vera dewlete “xuyê ey/halê ey rind nîyo” ame redkerdene.
Mehmet Sait Yildirim o girannêweş ke Hepisxaneyê Tîpê F ê Hêza Berze ya Kiriklar Numro 1 ê Îzmîrî de tepişîyeno, pawitîyêne ke 27ê Şibata 2025î de seba ke cezaya xo qedîyabî bêro verdayiş. La verdayişê Yildirimî hetê qerarê Heyetê Îdare û Çimverîye yê hepisxaneyî ra ame astengkerdene.
Yildirim, kombiyayişo peyên ê heyetî de ke 24ê Tebaxe de tede ca girot, dima yew alozî qelbî ra nêweş kewt û krîzê qelbî vîyarna. Yildirim vazna ra nêweşxane, anjîyo kerd û qelbê ey ra stent nîya ro. Dima dermankerdişê 4 rojan, Yildirim reyna birîya hepisxane.
Avuqata Yildirimî Fatma Demirer, vera qerarê heyetî yê 24ê Tebaxe de îtiraz kerd.
Hakimîye qerarê heyetî tesdiq kerd!
Hakimîya Înfazî ya 2. ya Îzmîrî ke muracaatê îtîrazî rest verê ci, 3ê Êlune de qerar redi da. Zê sebebê lazimî zî ame vatene ke qerarê Heyetê Îdare û Çimverîye yo ke vano “xuya ey rind nîya” û qerarê ci yo ke vano “3 aşmî bêro taloqkerdene” goreyê husul û qanûnan şaş nîyo.
