Serekwekîla Grûba DEM Partî Gulîstan Kiliç Koçyîgît dîyar kerd ke seba qanûnêko çerçewa ke heme kesan bigîro zereyê xo muzakereyî dewam kenê û wina vat: “Qanûn do verê tehtîlî bivejîyo la tarîx hema dîyar nîyo.”
Serekwekîla Grûba DEM Partî Gulîstan Kiliç Koçyîgît derheqê averşîyayîşanê rojevî de meclîs de eşkerayî daye.
Gulîstan Kiliç Koçyîgît derheqê qanûnê çarçewa de dîyar kerd ke ê serdemêko tarîxî de yê û wina vat: “Prosesê Aştî û Komelê Demokratîkî de ma arefeya qonaxê huqûqî de yê. No qanûnê çarçewa destpêkêk o û seba çareserîye eşkeno tesîrêko pîl bikero. Ganî o qanûn heme kesan bigîro zereyê xo û huqûqê kesanê ke agêrenê tewrê sîyasetî benê, ganî awan bikero. Ganî qanûnêko bi aqilê hemparî bêro meclîs. Ma veng danê partîyanê sîyasîyan ke xo munaqeşayanê rojaneyan de teng nêkerê. Ganî heme kes nê firsendê tarîxî baş bixebitno û destê xo binê kerra ra bikero. Ganî seba caardişê qanûnî zî meclîs berpirsîyarî bigîro. Heyetêko ke bieşko prosesî rayra bero ganî bêro awankerdiş. Dimayê qanûnî ganî qanûnanê ke vernîya demokrasî de asteng ê sey qanûnê terorî, bêrê vurnayîş. Sey DEM Partî ma do helwêstê xo yê averberdişê prosesî bidomnê. Firsendêko tarîxî vernîya- Tirkîya de yo. Seba baş xebitnayîşê nê firsendî lazimtî bi cesaretî û verdayîşê ezber û zîhnîyetê verênî est a. Eke ma behsê Tirkîyayêka newe bikerê lazimtî bi ziwan û sererastkerdişêko newe est a.”
‘Partîyanê sîyasîyan reyde dayîşûgirewtişî dewam kenê’
Persê rojnamegeran ser o Gulîstan Kiliç Koçyîgît dîyar kerd ke heyetê înan ê Îmralîyî dayîşûgirewtişê partîyanê sîyasîyan reyde derheqê qanûnê çarçewa de dewam kenê û da zanayene ke hema tarîxê qanûnê çarçewa dîyar nîyo la verê ke meclîs bikewo tehtîl do bivejîyo.
Gulîstan Kiliç Koçyîgît vat ke no hewte zî têgêrayîşê qanûnê çarçewa ser o do dewam bikerê, seba qanûnê çarçewa muzakereyê înan dewam kenê û wina vat: “Ma pawenê ke qanûnêko ke endamê rêxistine bieşkê agêrê û tewrê sîyasetê demokratîkî bibê, ê Ewropa bieşkê agêrê û kesê girewte yê bivejîyê. Meqsûd ser o pêşnimûne ser o heta nîka çîyêko şênber çin o.”
Çareserkerdişê problemanê wendekaran
Gulîstan Kiliç Koçyîgît bale ant rojevanê bînan ê meclîsî ser o û nê çîyî vatî: “Torbeyê qanûnan ê neweyî yênê meclîs. Îqtîdar torbeyanê ke cawap nêdanê lazimtîyanê komelî seba ke hûmara înan parlamento de zêde yo derbas kenê. Reaksîyonanê ma û ê muxalîfan ser o seba wendekaran gamêka bi nê tewirî ke wendekarê unîversîteyî efû ra îstîfade bikerê, înan zî ca girewt. Na gamêka pozîtîf. La hema zî nê qanûnê torbayî de wendekarî bi endamtîyanê rêxistine yenê sucdarkerdiş û heqê înan ê perwerdeyî yeno binpaykerdiş. Wendekarî seba ke viraştişê çalakî heqê înan o yenê sucdarkerdiş. AKP demo ke ame îqtîdar vatêne ma do YOKî hewanê. La dima ke AKP bi îqtîdar YOK hîna bi xurt bi û merkezî bi. Rîyê na rewşa perwerdeyî ra wendekaran perwerde ra fek verada. Rîyê feqîrîye ra bêçare yê kar bikerê benê la nê qanûnan de seba çareserkerdişê problemanê wendekaran çîyêko ca nêgîno. Ma do zî vera nê çîyî têkoşînê xo bidomnê. Sey DEM Partî ma do Komîteya Pêroyî de zî heqê perwerdeyî, azadîya fikir û ramanî û xoserîya unîversîteyan bipawê.”
Pawitişê gedeyan
Gulîstan Kiliç Koçyîgît dîyar kerd ke bi qanûnanê torbayî gedeyî sey sucdar yenê pênasekerdiş û qiseykerdişê xo wina domna: “AKP seba gedeyan ceza bikero qanûnan vejeno. Ma zî persenê şima 24 serrî yo îqtîdar de yê do tu polîtîkayêka ke gedeyan sucan ra bipawê nêdayî vernîya xo. Sîstem sucdaranê ke xebatkarê kamu yê paweno. Sucdarê polîtîkayanê îqtîdarî şenik nîyê. Meclîs de komîsyona ke sucanê gedeyan ser o cigêrayîş bikera ameye awankerdiş. Goreyê xebatanê na komîsyone sebebê sucanê gedeyan ceza nîyo, feqîrî ya. Wezaretê Komelkî û Keyeyî ganî seba pawitişê gedeyan suc û feqîrî ra polîtîkayan aver bero. La herinda ke ney bikerê gedeyan ceza kenê. Ma heme zî seba pawitişê gedeyan berpirsîyar ê. Ma vera nê kerdişan ê ke gedeyan ceza kenê. Ma do Komîteya Pêroyî de zî vera nê çîyî bivejîyê. Tay kesî zî seba ke embazê ma ê parlamenterî vera sucdarkerdişê gedeyan vejîyayî dejê xo sey mana mojnenê û kenê hedef. Sey DEM Partî ma do heta peynî vera nê çîyî bivejîyê.”
