Çimdarîya Heqanê Merdiman a Sûriya (SOHR) raporêko newe weşana û eşkera kerd ke Efrîn de sivîlê ke wazenê agêrê keyeyanê xo, rastê tehdît, şantajanê malî û astengîyan yenê. SOHRî seba cezakerdişê berpirsîyaran vengdayîşê ciperşayîşêk xoser kerd.
Çimdarîya Heqanê Merdiman a Sûriye (SOHR) binpaykerdişê ke vera nufusa herêmî ya Efrînî de dewam kenê belge keno. Goreyê raporê dezgehî, kesê ku wazenê keyeyan yan zî milkê xo yê verênî agêrê, rastê tehdîtanê rasterast û şantajanê malî yenê. Behsê naye yeno kerdene ke endamê verênî yê grûbanê çekdaran bi hawayêko sîstematîk tedayan serê nufusa herême de kenê û seba teslîmkkerdişê heqê înan ê bingeyînan waştişê pereyan kenê.
Goreyê şahîdanê çimdarîye ra ameye girewtene, hemwelatîyêko seba girewtişê keyeyê xo mecbur mendo ke hezar û 750 dolar bido,. Heto bîn ra, eynî kesî ra ameyo vatene ke seba fatûranê awe yê ke serra 2018 ra nat ameyê pêser, ganî hezar lîraya tirke û seba depoyê awe zî 50 dolar bido. Rastî de no pere ameyo girewtiş zî keye bi hawayêko talankerde teslîm bîyo. Ame dîyar kerdene ke birayê eynî kesî zî hedîseyêke wina de mecbur mendo ke hezar û 650 dolar bido. Na rewşe nîşan dana ke şantajo madî tekrar bîyo.
‘Eke şima pere nêdê ma do keye biveşnê’
Hedîseyêko bîn zî dewa Baflurî de qewimîya, hemwelatîyêko kurd rastê tedaya endamêko verên ê grûba ‘Hemzat’ ameyo. Nê kesî seba vengkerdişê keyeyî hezar û 300 dolar waşto û rasterast tehdîd kerdo ke eke pere nêro dayene keyeyî rijneno yan zî veşneno. Goreyê zanayîşanê çimdarîyan ra Merkezê Asayîşê Pêroyî yê Cindirêsî gerreyê hemwelatî nêkerdo, naye ra hemwelatî mecbur mendo ke pereyo ke ameyo waştiş bido. Sewbîna zî verê o keso ke keyeyî ra bivejîyo, têlanê elektrîkî yê keyeyî xirab kerdê û tayê çîyî zereyê keyî diznayê.
Tehdîdê zindanî vera wayîranê dikanan
Şarê herêmî bale ante naye ser ke waştişê agêrayîşê keyeyan yan zî dikanan zafê înan bi sucdarkerdişo sexte û tehdîdan netîce dano. Efrîn de wayîrê dikanêke dîyar kerd ke seba ke o fek dikanê xo ra verado bi serrî cezaya zindanî ameyo tehdîd kerdene.
Vengdayîşê SOHRî seba cipersayîşê xoserî
Çimdarîya Heqanê Merdiman ê Sûrîya vengdayîşê hetanê eleqedar kerd ke nê binpaykerdişan ser cipersayîşêk xoser bidê dest pêkerdene, kesê mesûlî bêrê muhakemekerdiş û şertî bêrê amadekerdene ke nufusa herême bê zor û tehdîdan bieşko şêro milkê xo bigîro. Dezgehî qetî kerd ke seba pawitişê milkê şexsî û garantî kerdişê heqanê şarê herême, hewceyîya bilez viraştişê qanûnan esta.
