DEM Partî Wan de kongreya xo ya pêroyî ra ver, konferansê herêma Serhedî viraşt. Latîf Çetînî qiseykerdişê xo de behsê muhîmiya vurnayîşî kerd û wina vat: “Ma zî wazenê bi na kongre sîyaseto demokratîk de, warê hişmendî, terz û metodî de vurnayîş û ravurnayîşî bîyarê ca.”
DEM Partî verê kongreya xo ya pêroyî ke do aşma êlule de bêro viraştene, herêman de konferansan virazena. Na çarçewa de bi şîarê ‘Seba cumhuriyetê demokratîkî, komelê azad û rêxistinbîyayeyî’ eywanê Tahîr Elçî yê Baroya Wanî de konferansê herêma Serhedî ame viraştiş. Hemserekê DEM Partî û DBP’yî yê şaristan û qezayanê Wanî, Hemsaredarê Şaredarîyanê DEM Partî yê herêma Serhedî, Parlamenterê DEM Partî yê herêma Serhedî, aktîvîstê TJA’yî, endamê meclisanê şaredarîyanê DEM Partî yê herêma Serhedî, Endamê meclisê ciwanan yê DEM Partî û endam û rayberê sazgehanê sivîlan tewrê konferansî bîyî. Weçînayîşê dîvanî ra dima, seba cangorîyanê ke têkoşînê demokrasiyî de ganê xo vîndî kerdê, deqeyêke rêzgirewtiş ame kerdene. Rêzgirewtiş ra dima beşdaran sloganê ‘Bijî Serok Apo’ berz kerd.
‘Perspektîf komara demokratîk a’
Rêzgirewtiş ra dima endamê MYKê DEM Partî Latîf Çetînî qiseykerdişo ewilîn kerd. Latîf Çetînî qiseykerdişê xo de bale ante serê amancê konferansî û wina vat: “Ma wextêko tarîxî ra ravêrenê. Mabênê Rêber Apo û dewlete de pêvînayîşî dewam kenê. Qanûnan ser o munaqeşeyî dewam kenê. Rayber Apo derheqê kongreyê DEM Partî de zî ewnîyayîşê xo eşkera kerdbî û vatbî ez wazena kongre virazî. La hetê ke ra zî tecrîd serê Serek Apoyî de yeno domnayene. Ma do paweyê perspektîfê Serekî de bê. La perspektîfê pêroyî zî cumhuriyeto demokratîk o.”
‘Ganî ma rayîrê çareserî bîyarê meydan’
Latîf Çetînî dewamê qiseykerdişê xo de behsê newebîyayîşî kerd û nê çîyî vatî: “Seba wextê Aştî û Komelê Demokratîkî de Serekî behsê newebîyayîş, xovurnayîş û ravurnayîşî kerd. Ma zî wazenê bi na Kongre siyaseto demokratîk de warê hişmendî, terz û metodî de vurnayîş û ravurnayîş bîyarê ca. Hişmendîya demokratîke ya herêmî xurtêr bikerê. Seba naye zî ma pêro berpirsiyar ê. Nê konferansan de zî ganî ma pêro bi hawayêko cesur kêmanîyanê xo tespît bikerê, raya çareserkerdişê nê probleman û kêmanîyan nîqaş bikerê, çareserî bîyarê meydan. Ganî her embaz nê babetan de bi hawayêko cesur erjnayîş û pêşnîyarê xo bikero.” Konferans qiseykerdişê destpêkî ra dima çapemenî rê girewte dewam kerd.
