GÎB-DERê li navçeya Peyasê ya Amedê bi dirûşmeya “Me bi ciwanî dest pê kir, em ê bi ciwanî bi ser bikevin” turnuvaya futbolê li dar xist. Turnuvaya ku di 20ê Tîrmehê de dest pê kiribû, îro bi lîstina maça fînalê bi dawî bû.
Komeleya Ji Bo Pêşerojê Em Li Vir In (GÎB-DER) li ber avahiya komeleya xwe ya li navçeya Peyas a Amedê bi dirûşmeya “Me bi ciwanî dest pê kir, em ê bi ciwanî bi ser bikevin” di 20ê Tîrmehê de turnuvaya futbolê organîze kir. Armanca vê turnuvayê ew e ku çanda taxê ya kevnar dîsa zindî bikin û zarok û ciwanan ji cixare û hişbirê dûr bixin. Turnuva di 3 kategoriyên cuda de ji bo temenên 8-10, 11-13 û 14-17 hat lidarxistin. 15 tîm û 75 zarok di turnuvayê de cih girtin. Gelek welatî û zarok ji bo temaşekirina maçê hatin heman cihî. Zarokan bi kelecaneke mezin di maça fînalê de lîst.
Endamên GÎB-DERê diyar kirin ku xebatên wan ên ji bo ciwanan dê berdewam bikin. Hate zanîn ku roja duşemê dê turnuvaya voleybolê dest pê bike.
Fînala turnuvayê bi coşeke mezin bi dawî bû.
