Îdarekara DBP’yî Zîlan Kaplan, bale ant felsefeya “Jin, jîyan, azadî” ser û vat: “Felsefeya ke hetê Birêz Ocalan ra ame averşîyayîş, semedê azadîya cinî, bî xerîteya rayîrî. Na felsefe hemverê her tewir zextê dewlete û komelî ya.”
Komployê mîyanneteweyî yê hemverê Rayberê PKK’yî Abdullah Ocalanî serra 26’ine de yo. Abdullah Ocalan, 9ê teşrîna verêne 1998ine de Sûrîye ra ame vetiş û 15ê Sibata 1999ine de zî ard Tirkîya. Abdullah Ocalan a roje ra heta nika Zîndanê Tîpê Fyê bi Asayîşê Berzî yê Îmraliyî mîyanê şert û mercê giranî yê tecrîdî de yeno tepiştiş. Bi paradîgmaya azadîye Abdullah Ocalan felsefeya “Jin jîyan azadî” aver berd. Na felsefe nika temamê dinya de veng da.
Îdarekara Partîya Herêmanê Demokratîke (DBP) ya Wanî Zîlan Kaplan derheqê komployê hemverê Rayberê PKK’yî Abdullah Ocalanî yê tesîrê ci cinîyan ser ajansê ma JINNEWS’î rê qisey kerd.
‘Muxalefet zî sey îqtîdarî sûcdar o’
Zîlan Kaplan, dîyar kerd ke tecrîd nika tena Îmraliyî de hemverê temamê welatî de vila bîyo û wina dewam kerd: “Muxalefeto ke xo sey têduşt û bi edalet mojneno, tena mîyanê hewldayîşê bêedaletî de yo û sey hîrê meymûnan têgêreno. Wexto ke qalê tecrîdî yeno kerdiş, xo bêveng keno, nêvîneno û nêeşnaweno. Rewşêke wina de têgêrenê. Xora îqtîdar muxalefetî ard na rewşe. Îqtîdar qalkerdişê tecrîdî sey propagandaya rêxistine girewt dest û muxalefet zî nê ra tersa. Muxalefet xo ver nêda. Nê semedî ra tecrîd vilayê temamê welatî bîyo, çend sûcê îqtîdarî bibo zî sucê muxalefetî zî est o.”
‘Têkoşînê Birêz Ocalanî têkoşîna ma yo’
Zilan Kaplan, dewam de wina vat: “9ê teşrîna verêne 1998ine de dest pêkerd û 15ê Sibata 1999ine de komplo ame temamkerdiş. No komplo tena hemverê şexsê Rayberê PKK’yî Abdullah Ocalanî de nê hemverê têkoşînê azadîya şarê kurdî, bi taybetî zî hemverê cinîyê kurdî pê ame. Semedo ke paradîgmaya ke Birêz Ocalan aver berd, azadîya cinîyan esas girewt û hemverê zîhnîyetê serdestî yê camêrdî vejîya. Paradîgma cinî sey kirde girewt dest. Komplo semedê cinîyan nêbî rijnayîş, bî prosesê zanebîyayîş û xoverdayîşî. Cinîyê kurdî vatî; ‘Têkoşînê Birêz Ocalanî, têkoşînê ma yo’. Hem wareyê sîyasî de û hem zî wareyê cuya xo de bi rêxistin kerd.”
‘Hemverê îdeolojîya azadîye tecrîd’
Zîlan Kaplan, wina qalê tesîrê tecrîdî kerd: “Tecrîdê 26 serran tena îzolasyonê fîzîkî nîyo, eynî wextî de îzolasyonê fikrê azadîye yo. Felsefeya ‘Jin jîyan azadî’ ke hetê Birêz Ocalanî ra ame averşîyayîş, semedê cinîyan bî xerîteya rayîrî. Na felsefe semedê azadîya cinîyan ê hemverê tedayê dewlete û komelî ya. Na felsefe bî sebeb ke cinî serkêşîya komelî bikerê. Tîya de tecrîd keweno merîyet û hemverê îdeolojîya azadîya komelî de beno asteng.”
‘Tena azadîya Birêz Ocalanî nê azadîya cinîyan zî yena waştiş’
Zîlan Kaplan, dîyar kerd ke çalakîyê ke 15ê Sibate de yenê organîzekerdiş, semedê azadîya Abdullah Ocalanî yê û wina vat: “15ê Sibate de tena azadîya Birêz Ocalanî nê, azadîya cinîyan zî yena waştiş. Her roja ke derbaz bena, temamê dinya de têkoşînê cinîyan ê semedê azadîye pîl beno.”
