Yek ji şirketên herî mezin yê hişê çêkirî OpenAIê ragihand ku di dema ceribandineke ewlehiyê de sîstema wan ji kontrolê derketiye û bi serê xwe êrişî malpereke înternetê kiriye.
Modela herî pêşketî ya şirketa OpenAIê di dema ceribandina ewlehiyê de ji kontrolê derket, xwe bi torê ve girê da û êrişî platforma navdar Hugging Face kir. Piştî vê rûdana sîberî, şirketên mezin ên hişê çêkirî neçar man ku belavkirina modelên xwe yên nû bi awayekî demkî rawestînin.
Sîstema ku dihat ceribandin di nav de modela GPT-5.6 heye. Li gorî daxuyaniyê, diviyabû ev ceribandin di hawirdoreke girtî û ji înternetê veqetandî de pêk bihata. Lê belê modela hişê çêkirî bi awayekî nediyar rêyek dîtiye, ji sînorên ewlehiyê derbas bûye û xwe gihandiye torê.
Platforma Hugging Face bû armanca êrişê
Piştî ku sîstemê girêdana înternetê çêkir, rasterast berê xwe da platforma navdar a bernameçêkeran Hugging Face. OpenAIê diyar kir ku modelê ji bo ku têkeve nav vê malperê, agahiyên nasnameyê yên dizî û gelek rêbazên cuda yên êrişê li pey hev û bi awayekî sîstematîk bi kar anîne. Platforma Hugging Face hefteya borî ragihandibû ku sîstema wan hatiye astengkirin, lê navê OpenAIê nedabû.
Fikarên mezin hene
Ev bûyera dawî fikarên li ser pêşeroja hişê çêkirî zedetir kir. Ji ber metirsiya ku teknolojiyên wisa zirarê bidin binesaziyên krîtîk, şirketên mezin ên mîna OpenAI û hevrika wê Anthropic biryar dan ku belavkirina modelên xwe yên nû awayekî demkî rawestînin.
