Serekê Pêroyî yê PSK’yî Bayram Bozyelî derheqê hêrîşanê dewletanê mîyanneteweyî û herêmî yê vera destkewtanê şarê kurdî de qisey kerd û dîyar kerd ke ganî kurdî sîyasetê xo goreyê menfaetanê xo yê neteweyîyan awan bikerê û vat: “Hemkarîya ke Rojhelatê Kurdîstanî de mabênê partîyanê kurdan de ameya kerdene, ganî parçeyanê bînan de zî bêra kerdene.”
Rojhelatê Mîyanên ke bîyo qada şerê hêzanê hegemonîk û îqtîdaran, şarê kurdî reyna tehlukeyêko gird reyde rî bi rî yo. Demêko ke şerê îqtîdarîye yê mabênê Dewletanê Yewbîyayeyan ê Amerîka (DYA) û Îranî xorîn beno; dewletê Tirkîya, Îran, Îraq û Sûrîye ke estbîyayîşê xo înkarkerdişê kurdan ser o awan kerdo, bi hemkarîya tayê hêzanê mîyanneteweyî û nê tehlukeyanê amadeyan statu û destkewtanê neteweyî yê kurdan asteng kenî.
Pêvînyîşê peyên ê hêzanê herêmî û mîyanneteweyî yê çeleyê 2026î de yê vera Rojavayê Kurdîstanî mojneno ke vera kurdan tifaqêk yeno kerdene. Hetê bînî ra rixmê peymana ke 18ê hezîrane de ameybî îmzekerdene zî no hewteyêk o kaos hîna zaf gir bîyo. Demêkî de ke şer hîna zêde beno, Îran hêrîşê qerargeh û cayanê partîyanê kurdan ê Başûr û Rojhelatî keno.
Serekê Pêroyî yê Partîya Sosyalîst a Kurdîstanî (PSK) Bayram Bozyelî derheqê nê şerê mabênê DYA-Îranî û tesîrê ci yê kurdan ser o qisey kerd.
‘Sîyasetê Amerîka bêprensîp û bêbawerî yo’
Bayram Bozyelî bal ant rolê DYA yê şerê herêmî ser o û dîyar kerd ke Amerîka seba pawitişê menfaetanê xo û garantîkerdişê ewleyîya Îsraîlî şerekê bêprensîp keno. Bayram Bozyelî bedilîyayîşê sîyasetê Amerîka yê vera kurdan ser o zî wina vat: “Demê Trumpî de mesajî ameybî dayene ke do kurdan reyde têkilî û dîyalog bêrê xurtkerdiş. O wext Serek Mesûd Barzanî û Bafil Talebanî reyde pêvînayîşê telefonî ameybî kerdene û mesajê piştgîrîya kurdanê Rojhelatî ya vera rejîmê Tehranî ameybî dayene. Labelê dima ra ma dî ke rîyê tedaa û sîyasetê Tirkîya ra, Amerîka nê nêzdîbîyayîşê xo ra fekverada, heta kurdan dizdîya çekan reyde zî sucdar kerd. Na tablo bi zelalî mojnena ke sîyasetê Amerîka sîyasetêko bêprensîp o û bawerî nêdano tu hêzî.”
‘Îran estbîyayîşê xo çinbîyayîşê kurdan reyde girêdana’
Bayram Bozyelî îfade kerd ke Îran bi manayê xopawitişî hêrîşê kurdan keno û wina dewam kerd: “Kurdî nê şerê hegemonîk de terefgir nîyê, labelê reyna zî Îran hêrîşê kampanê kurdan ê serê sînorî û qezayanê başûrê Kurdîstanî keno. Seba rejîmê Îranî, parçe-parçebîyayîşê welatê înan zî muhîm nîyo; waştişê înan o tekane no yo ke kurdî neresê heqanê xo. Îran her firsend de kurdan sey dişmenêko stratejîk pênase keno.”
‘Vera kurdan tifaqêkê mîyanneteweyî û herêmî est o’
Bayram Bozyelî vat ke her çar dewletê îşxalkerî seba çinbîyayîşê kurdan ameyê awankerdene û vat ke nê dewletî bi pêro îmkananê xo wazenî vernîya heqanê neteweyî yê kurdan bigîrê. Bayram Bozyelî dîyar kerd ke hêrîşî tena hetê yew dewlete ra nîyê û wina vat: “Ma prosesêk de yê ke Tirkîya, Îran, Îraq û Sûrîye mîyanê tifaqêkê de-facto de yê. Tirkîya tena vakur de nê, rojava û başûr de zî vera destkewteyanê kurdan têgêrena. No sîyaset hetê Îranî de zî yeno rayraberdiş. Ma nê referandumê 2017 ê Kerkûkî de zî dî. Demêk de zî ma vînenî ke hêzê mîyanneteweyî zî benê hemkarê na tifaqê vera kurdan. Sey nimûne, çeleyê 2026î de Tirkîya, Îsraîl, Amerîka, Fransa û Sûrîye pêkerd û vera statuyê rojavayê Kurdîstanî, bi taybetî taxanê kurdan ê Helebî de, zerarêko pîl da destkewteyanê kurdan.”
Vengdayîşê yewbîyayîşê kurdan
Bayram Bozyelî bal ant tifaqê qirkerdişî yê dewletan ser o û wina vat: “Ganî kurdî sîyasetê xo goreyê menfaetanê xo yê neteweyîyan awan bikerê, goreyê şerê Amerîka û Îranî nê. Seke şeş partîyanê rojhelatê Kurdîstanî hemkarîyêk viraşta, ganî no parçeyanê bînan de zî bêro kerdiş. Eger ma ewro nêşinî kongreyêka neteweyî awan bikerê zî, ganî ma programê heqê tayînkerdişê qederî û serwerîye ser o koordînasyonêk mabênê her çar parçeyan de bîyarê ca.”
‘Îran wazeno başûrê Kurdîstanî qels bikero’
Bayram Bozyelî bal ant amancanê Tirkîya û Îranî yê serê vakur û başûrê Kurdîstanî ser o û qiseykerdişê xo wina qedîna: “Ya yewîne, Îran wazeno başûrê Kurdîstanî ceza bikero, çunke zafbîyayîşê pêşmerge û sîvîlanê Rojhelatê Kurdîstanî uca de bi ca bîyo. Ya diyîne zî, Herêma Kurdîstanî ewro seba pêro kurdan merkez û statuyêk o. Tewrê kêmanîyan zî o ber, berê dîplomatîk ê kurdan o ke vengê înan resneno dinya. Îran nê statuyî ra aciz o û nêwazeno kurdî uca de bihêz bibê. O semed ra zî her firsend de wazeno statuyê Herêma Kurdîstanî qels bikero û uca de bêîstîqrarî awan bikero.”
