Bi boneya salvegera Rojiya Mirinê ya 14ê Tîrmehê li Riha û Sêrtê bernameyên bîranînê hatin lidarxistin. Di bernameyan de wiha hat gotin: “Şehîdên Tevgera Azadiyê nirxên me yên herî girîng in. Em li ber berxwedana wan bejna xwe ditewînin. Em ê her tim bibin şopdarên rêya wan.”
Riha
MEBYA-DERa Rihayê, bi boneya salvegera Berxwedana Rojiya Mirinê ya Mezin a 14ê Tîrmehê ya li Zindana Amedê, li avahiya xwe ya navçeya Xelîliyê bernameyeke bîranînê li dar xist. Her wiha di heman saetê de li navçeyên Pirsûs, Wêranşar, Sêwerek, Serêkaniyê, Xelfetî, Bêrecûk û Hilwan yê Rihayê jî bernameyên bîranînê hatin lidarxistin. Rêveber û nûnerên partiyên siyasî, saziyên demokratîk ên sivîl û gelek welatî tevlî bernameyan bûn.
Bernameya li navenda Rihayê bi deqeyeke rêzgirtin ê ya ji bo bîranîna şehîdên têkoşîna azadiyê û demokrasiyê dest pê kir. Piştî rêzgirtinê, sînevîzyona ku li ser berxwedan û jiyana pêşengên 14ê Tîrmehê hatibû amadekirin, hat nîşandan.
‘Şehîd nirxên me yên herî girîng in’
Piştî sînevîzyonê, Hevseroka MEBYA-DERa Rihayê Makbûle Yavûzer bal kişand ser girîngiya berxwedana zindanan û wiha got: “Şehîdên Tevgera Azadiyê nirxên me yên herî girîng in. Heke şehîdên me nebûyana, em îro nikaribûn li vir li hev biciviyana. Heke em vê berxwedana wan ji bîr bikin, em ê xwe ji bîr bikin.”
‘Ew ê her tim di dile me de bin’
Xwişka Alî Çîçek, Ayşe Çîçek jî di bernameyê de axivî. Ayşe Çîçek, tevahî cangoriyên têkoşîna azadiyê bi bîr anî û got: “Şehîdên me şehîdên dilê me ne û dê her tim di dilê me de bin. Bijî berxwedana zindanan.”
‘Berxwedana wan moral û çoş da gelan’
Herî dawî Berdevkê Însiyatîfa 78an a Rihayê Vahît Akgun axivî. Akgun di destpêka axaftina xwe de nivîseke însiyatîfa 78an a li ser girîngî û wateya Berxwedana 14ê Tîrmehê xwend. Akgun destnîşan kir ku mirov dikare bi salan li ser kesayet û berxwedana wan qasidên azadiyê biaxive û wiha bi dawî kir: “Heke em li jiyan û berxwedana wan binêrin, li pêşiya me tu pirsgirêk namînin. Tenê îrade û laşê wan hebû û wan bi vê yekê dîrok nivîsand. Berxwedana wan moral û coşeke mezin da hemû gelan. Em li ber berxwedana wan bejna xwe ditewînin. Em ê her tim bibin şopdarên rêya wan.”
Piştî axaftinan bername bi lêxistina çepikan bi dawî bû.
Sêrt
Bi boneya salvegera Rojiya Mirinê ya14ê Tîrmehê bi pêşengiya Komeleya Piştevanî û Alîkariyê ya Malbatên ku di Dergûşa Şaristaniyê de Xizmên Xwe Winda Kirin (MEBYA-DER) a Sêrtê di zikê avahiya eywana civînê ya DEM Partiyê ya Sêrtê de cangoriyên meha Tîrmehê bi bîr anîn. Di bernameyê de rêveber û endamê partiyên siyasî yên Sêrt, MEBYA-DERê, TUAY-DER, hevşaredarên Sêrtê û gelek endamên saziyên civakî yên bajêr amade bûn. Li ser pankartê wêneyên cangoriyên 14ê Tîrmehê û Alî Haydar Kaytan hebûn û nivîsa “Pakrewan û pêşengên meha Tîrmehê nayên jibîrkirin” hatibû nivîsandin, hat daliqandin. Girseya ku li wir amade bû ji bo kesên ku têkoşîna azadiya Kurdistanê de jiyana xwe ji dest dane deqeyek rêz girtin û piştî rêzgirtinê dirûşmeya “Şehîd namirin” berz kirin. Piştre sînevîzyon ku ji bo 14ê Tîrmehê hatibû amadekirin hate weşandin.
‘Wan zilmê têk bir û berxwedanê nîşanî me dan’
Hevserokê MEBYA-DERa Sêrtê Abdûrrahîm Çetîn li ser navê saziyê axivî û got: “Îro 44emîn salvegera 14ê Tîrmehê ye. 14ê Tîrmehê ji bo gelê Kurd û Rojhilata Navîn gelekî girîng e. Û roja şehadeta 4 hevalên me yên ku faşîzma 12ê Îlonê têk birin e. Em heta niha bi saya van şehîdan li ser pêya mane û em Kurd mane. Wan zilmê têk bir û berxwedanê nîşanî me dan. Di kesayeta van her çar hevalan de, di vê mehê de gelek lehengên me şehîd hene û bi vî awayî di her mehê de hevalên yên şehîd hene. Hevalê Kemal Pîr dibêje; em bi qasî ku ji jiyanê hez dikin, wisa diçin mirinê. Ew heta mirinê wan rojiya mirinê berdewam kir. Ew berxwedana wan ku wê demê dabûn meşandin îro jî ji bo me derbasdar e.”
Bername bi xwendina helbestan bi dawî bû.
